Փաշինյանն ու իր թիմը սկսել են Արցախի դե յուրե հանձնումը

Արցախի Հանրապետությունում Հայաստանից զորակոչված ժամկետային զինծառայողներ չեն լինի, սակայն Լեռնային Ղարաբաղում զորակոչիկները կշարունակեն զորակոչվել Պաշտպանության բանակում ծառայելու: Այս մասին ՀՀ ԱԽ քարտուղարն ասել է «Արմենպրես»-ին տված հարցազրույցում:

Ըստ էության, քանդվում է այն միֆը, որ իշխանությունները պայքարում են Արցախի համար անվտանգային միջավայրը բարելավելու և անվտանգության երաշխիքներ ստանալու համար: Մինչ այս պահը, իշխանական և մերձիշխանական շրջանակները ամեն կերպ հերքում էին տարածվող տեղեկությունները և, ըստ էության, մոլորեցնում հանրությանը՝ պնդելով, որ նման հարց անգամ չի քննարկվում: Այժմ, այդ նույն հանրությունը արդեն որերորդ անգամ կանգնում է փաստի առաջ, ոչ միայն քննարկվում է, այլև հասել է իրագործման փուլին՝ ի հաշիվ հայ ժողովրդի շահերի:

ՀՀ զինծառայողների դուրս բերումը Արցախից հղի է մի շարք վտանգներով, որոնք անխուսափելիորեն ի հայտ են գալու, եթե ՀՀ զինված ուժերը լքեն Արցախի Հանրապետությունը: Առաջին հերթին պետք է փաստել, որ Նիկոլ Փաշինյանը և իր թիմը արցախցիների անվտանգության ապահովումը թողնում են ռուս խաղաղապահներին, որոնք իրենց մանդատի համաձայն չունեն կրակ բացելու իրավունք: Այսինքն, եթե հայ զինծառայողների դուրս գալուց հետո ադրբեջանական կողմը նախաձեռնի ռազմական պրովոկացիա, ապա ռուսական կողմը, առնվազն ռազմական ճանապարհով, այդ հարցին լուծում տալու իրավունք և հնարավորություն չի ունենալու:

Ավելին, եթե կնքվի խաղաղության պայմանագիրը, ինչի ջատագովներն են գործող իշխանությունները՝ ռուս խաղաղապահ բրիգադը պետք է լքի Արցախը: Այդ դեպքում արցախցին մեն մենակ է մնում ադրբեջանական կանոնավոր բանակի դիմաց և ըստ խաղաղության պայմանագրի՝ Հայաստանը ցանկության դեպքում էլ չի կարողանալու օգնություն տրամադրել Արցախին:

Արդյոք՞ սա անվտանգության երաշխիքների ձեռքբերում է, ինչպես մեզ ամիսներ շարունակ փորձում էին համոզել իշխանությունները և պնդում էին, որ բանակցությունները ընթանում են հենց այդ երաշխիքները ձեռք բերելու շուրջ: Այս քայլով ՀՀ իշխանությունները վերջնականապես են ձեռք քաշում Արցախից և արդեն դե յուրե դադարում են լինել Արցախի անվտանգության երաշխավորը՝ դրանից բխող բոլոր հետևանքներով...