Վահան Քերոբյանի ներդրումների «փուչիկը» պայթեց

Ի հեճուկս ՀՀ կառավարության հավակնոտ հայտարարությունների՝ վիճակագրական կոմիտեն հրապարակել է 2022 թվականի հունվար-մարտ ամիսներին օտարերկրյա ներդրումների վերաբերյալ տվյալներ, ըստ որոնց՝ այս տարվա առաջին եռամսյակի ընթացքում ներդրումները կրճատվել են 65 տոկոսով կամ 49,9 մլրդ դրամով։ Անցած տարվա համեմատ կտրուկ նվազել են Վերակառուցման և զարգացման Եվրոպական բանկի(-33,9 մլրդ), Գերմանիայի(-22.18 մլրդ), Նիդերլանդների(-16,2 մլրդ), Իտալիայի(-3,48 մլրդ), Կանադայի(-2,56 մլրդ) և Ճապոնիայի(-1,85 մլրդ)ներդրումները։ ՀՀ վիճակագրությամբ ընդամենը ներդրումները ներառում են ուղղակի, պորտֆելային և այլ ներդրումները (վերջինում ներառվում ենվարկերը և փոխառությունները, ապրանքների և ծառայությունների դիմաց վճարվելիք/ստացվելիք գումարները,ստացված/տրված կանխավճարները)։ Անշուշտ, այդ ներդրումների նվազումը մեծ ազդեցություն է թողնում երկրի տնտեսական իրավիճակի վրա ինչպես հիմա, այնպես էլ ապագայում։

Ուշագրավ է այն, որ վիճակագրական կոմիտեն փաստացի պայթեցնում է կես տարի էկոնոմիկայի նախարար Վահան Քերոբյանի կողմից փչած փուչիկը առ այն, որ ներդրումները պարզապես հորդում են, որ իր ձեռքի տակ միլիարդավոր ներդրումներ ենթադրող փաթեթներ են: Սա թերևս Քերոբյանի ամենամեծ փուչիկն էր, քանի որ նրա ողջ փիառը և աշխատանքի արդյունավետության գլխավոր ապացույցը հենց ներդրումների մասին խոսակցություններն էին: Խոսակցություններ, որովհետև գործնականում դրանց գոյության որևէ ապացույց նախարարը այդպես էլ չբերեց և ինչպես տեսնում ենք՝ պարզ է, թե ինչու...