Հրաչյա Սարգսյանը պատրաստվում է լրջորեն վտանգել երևանցիների առողջությունը

Ավան վարչական շրջանում հերթական քննարկումն է ընթանում՝ շենքերի մոտ պղնձաձուլարան բացել–չբացելու շուրջ։ Նախորդ քննարկումներին ներկայացված նախագծի համաձայն՝ Ավան վարչական շրջանում «Քոփփեռ» ՍՊԸ-ն նախատեսում է գունավոր մետաղների ջարդոնից տարեկան ստանալ պղնձի, ալյումինի մոտ 1800 տ համաձուլվածք։ Ձուլարանի արտանետումները պիտի լինեին բնակելի շենքերից մոտ 600 մետր հեռավորության վրա։ Այս տարբերակը Շրջակա միջավայրի նախարարությունն անթույլատրելի էր համարել՝ պահանջելով, որ ձուլարանը բնակելիներից հեռու լինի ևս 300 մետրով, իսկ արտադրական ծավալները կրճատվեն 50%-ով։

Այժմ «Քոփփեռ» ՍՊԸ-ն փոփոխություններ է արել նախագծում և ներկայացնում է լրամշակված տարբերակը։ Սակայն այս տարբերակը ևս անընդունելի է բնակիչների համար։ Նրանք, առհասարակ, չեն ցանկանում, որ իրենց շենքերի տարածքում պղնձաձուլարան բացվի։

Հիշեցնենք և ընդգծենք՝ առկա է Երևանի քաղաքապետարանի 2021 թ. աշնանը տրված բացասական եզրակացությունը՝ Ավանում պղնձաձուլանարն հիմնելու նախագծի վերաբերյալ և շատ հիմնավոր կերպով այն տապալվեց Հայկ Մարությանի պաշտոնավարման օրոք: Բայց նրա հեռանալուց հետո գործարարն, ինչպես երևում է, ձեռքերը ծալած չի նստել: Նա կարողացել է ժամանակ շահել ու Կառավարությունում Հայկ Մարությանի հրաժարականից հետո ձեռքեր սեղմել, որպեսզի Ավանում իր ուզած տեղը պղնձաձուլարանն այդուհանդերձ հիմնի: Ո՞րն է այստեղ քաղաքապետ Հրաչյա Սարգսյանի դիրքորոշումը, Ավանի թաղապետը, ի դեպ, հայտնել է, որ տեղյակ չէ, թե ովքեր են փորձում ձուլարան կառուցել, սակայն ինքն էլ է դեմ այդ նախագծին: Կո՞ղմ է արդյոք քաղաքապետը, ով ամեն առիթով նիստերի ընթացքում հայտարարում է, որ երևանցիների առողջության պահպանումը պետք է առաջնային լինի քաղաքին վերաբերվող բոլոր հարցերը լուծելու ընթացքում: Հրաչյա Սարգսյանը նույնպե՞ս տեղյակ չէ, որ իր ղեկավարած քաղաքում փորձում են հարվածի տակ դնել երևանցիների առողջությունը, թե տեղյակ է, սակայն նիստերի ընթացքում իր հնչեցրած բոլոր մտահոգությունները ընդամենը դասական պոպուլիզմ էին, իսկ իրականությունն այն է, որ քաղաքապետը պատրաստ է վտանգել երևանցիների կյանքն ու առողջությունը` հանուն գործարարի բիզնեսի բարեկեցության...