Պարո՛ն քաղաքապետ, Ձեզ երբևէ չի՞ հետաքրքրել, թե ուր են մեր քաղաքի հաշմանդամները (տեսանյութ, լուսանկարներ)

«Հույսի կամուրջ» հասարակական կազմակերպությունն այսօր Էրեբունի-Երևանի տոնին ընդառաջ քաղաքապետարանի մոտ ակցիա էր կազմակերպել «Երևանը նաև իմ քաղաքն է» խորագրով։

Հայաստանում ապրում է հաշմանդամություն ունեցող ավելի քան 180.000 մարդ։ Նրանք զրկված են ազատ տեղաշարժվելու, կրթական, մշակութային, առողջապահական  և այլ վայրեր այցելելու, տրանսպորային միջոցներից օգտվելու և հասարակական կյանքին մասնակցելու տարրական հնարավորություններից։

Այսօր բազմաթիվ նախագծեր են մշակվում, տարբեր ծրագրեր են իրականացվում՝ ուղղված մայրաքաղաքի բարեկարգմանն ու տրանսպորտի վիճակի բարելավմանը, բայց հաշմանդամություն ունեցող մարդիկ շարունակում են մեկուսացած ապրել։

Այս և նման խնդիրներն էին այսօր բազմաթիվ հաշմանդամների բողոքի թեման։ Նրանք եկել էին հանդիպելու Երևանի քաղաքապետ Տարոն Մարգարյանին և անձամբ հանձնել նամակ, որով խնդրում էին իրենց ևս ներառել այս քաղաքի ընդհանուր զարգացման ծրագրերին։

«Մենք օտար են զգում մեր քաղաքում, Երևանը մերը չէ։ Պարո՛ն քաղաքապետ, Ձեզ երբևէ չի՞ հետաքրքրել, թե ուր են մեր քաղաքի՝ հաշմանդամություն ունեցող բնակիչները, և թե ինչու նրանց չեք հանդիպում այն վայրերում, որտեղ մյուսներին կարելի է տեսնել։ Անգնահատելի է ձեր նախաձեռնությունը Երևանում խաղահրապարակներ կառուցելու գործում, բայց երբևէ մտածե՞լ եք, թե ուր են հաշմանդամություն ունեցող երեխաները... թե՞ նրանք  խաղալ չեն ուզում։  

Այսօր հաշմանդամություն ունեցող մարդիկ շարունակում են մեկուսացած ապրել մեր քաղաքում»,- գրված էր քաղաքպետին ուղղված նամակում։

{gallery}q{/gallery}