ԵՄ-ն նոր պատժամիջոցներ է սահմանել Սիրիայի նկատմամբ

ԵՄ պետությունները համաձայնեցրել են նոր պատժամիջոցներ Սիրիայի նկատմամբ, որոնք արգելում են սիրիական ավիաընկերությունների ինքնաթիռների թռիչքները դեպի ԵՄ պետություններ. հայտնում է Голос России-ն։

«Սիրիական վարչակարգի վրա ճնշման հիմնական բոլոր միջոցները համաձայնեցված են»,-հայտնել է ԵՄ պետություններից մեկի ԱԳՆ ներկայացուցիչը։ «Մոտակա երկուշաբթի դրանք հաստատման կդրվեն ԵՄ արտաքին գործերի նախարարների նիստում՝ Լյուքսեմբուրգում»։
Նոր պատժամիջոցները վերաբերում են սիրիական ավիաընկերություններին, ռազմական արդյունաբերությանն ու ապահովագրական գործունեությանը։ Այսպես, սիրիական ինքնաթիռներին կարգելվի ԵՄ պետությունների օդանավակայաններում վայրէջք կատարել։ Արգելք կմտցվի նաև ԵՄ պետությունների կողմից սիրիական զենքի և ռազմական սարքավորումների գնման վրա։

Այս պատժամիջոցները հաշվով 18-րդն են, որ ԵՄ-ն նախաձեռնում է Սիրիայի դեմ։