Պայքար՝ Փաշինյանի «սիրտը» շահելու համար. ով է ցանկանում զբաղեցնել Պապիկյանի տեղը

Սեպտեմբերի 18-ին կայանալիք վարչության ընտրությանը և կուսակցության համագումարին ընդառաջ՝ «Քաղաքացիական պայմանագիր» կուսակցության ներսում կրքերը չեն հանդարտվում: Մասնավորապես, շատ ՔՊ-ականների դուր չի գալիս ՔՊ քաղաքապետի թեկնածու Տիգրան Ավինյանի պահվածքը: Բանն այն է, որ վերջինս հավակնում է դառնալ ՔՊ վարչության նախագահ, քանի որ չեն կարող նախագահ լինել ոչ Նիկոլ Փաշինյանը, ոչ էլ ներկայիս նախագահ Սուրեն Պապիկյանը. ռոտացիոն կարգով պետք է փոխվի նախագահը՝ ըստ ՔՊ կանոնադրության: Եվ, ահա, Ավինյանը, կարծես թե, իր առանձին թիմն է ձևավորել ու թեժ պայքարում է նախագահի կարգավիճակի համար՝ կանգ չառնելով ոչնչի առջև:

Տիգրան Ավինյանը, ըստ էության, որոշել է ինքն իրեն ապահովագրել: Վերջինս հասկանում է, որ հաշվի առնելով ՔՊ ներսում առկա աժիոտաժը և չվերջացող պայքարը՝ կարող է ստեղծվել մի իրավիճակ, երբ վերջինս այդպես էլ չի ստանա քաղաքապետի բաղձալի պաշտոնը:  Այդ իսկ պատճառով այժմ Ավինյանի համար շատ կարևոր է որպես հակակշիռ ունենալ առնվազն ՔՊ վարչության նախագահի պաշտոնը, որն իրականում բավականին առանցքային դերակատարում է  ենթադրում և այդ պաշտոնը զբաղեցնողին ավտոմատ կերպով ապահովում է դիրքն իշխանության վերին էշելոնում:

Դա է պատճառը, որ տվյալ պաշտոնի համար պայքարում Ավինյանին չեն զիջում իր իսկ թիմակիցները: Դիցուք՝ հաջորդ թեկնածուն նախկին նախարար Արսեն Թորոսյանն է: Թորոսյանը չի հաշտվել այն մտքի հետ, որ ստիպված է եղել գործադիրում աշխատանքը փոխարինել օրենսդիր մարմնում ստացած մանդատի հետ, նրա ամբիցիաներն ավելին են և հենց դա է պատճառը, որ Թորոսյանն մինչ այս պահն էլ ակտիվ մարզային վոյաժների մեջ է և փորձում է լծակներ ստանալ՝ վարչության նախագահի պաշտոնը զբաղեցնելու համար:

Հաջորդ թեկնածուն, ով ցանկանում է զբաղեցնել այս պաշտոնը, Արփի Դավոյանն է, վերջինս փորձում է շահել Փաշինյանի սիրտն` ընդդիմադության հասցեին իր սուր քննադատություններով, հաճախ անգամ այնտեղ, որտեղ դրա կարիքը բնավ չի զգացվում: Այսպիսով, Դավոյանը ցանկանում  է ընդգծել իր լոյալությունը Նիկոլ Փաշինյանին և ցույց տալ, որ եթե իրեն վստահվի վարչության նախագահի պաշտոնը՝ ինքնուրույն խաղեր վարել ինքը չի պատրաստվում:

Եվ վերջապես վերջին թեկնածուն Վահագն Ալեքսանյանն է: Նա նույնպես բավականին ակտիվ է ընդդիմադիրներին քարկոծելու գործում, սակայն թերևս ունի ամենափոքր շանսերը զբաղեցնելու բաղձալի պաշտոնը:

Թե ով կընտրվի ՔՊ վարչության նախագահ` ցույց կտա ժամանակը, մի բան ակնհայտ է` Նիկոլ Փաշինյանն է որոշելու արդյունքում, թե ով կզբաղեցնի այդ պաշտոնը, քանի որ ժամանակը ցույց տվեց, որ ժողովրդավարություն ասվածը ՔՊ-ում, մեղմ ասած, չի աշխատում...