Տարոն Մարգարյանը պարգևատրվել է «Համագործակցության համար» մեդալով

Երևան քաղաքի զարգացման, ՀՀ ոստիկանության և Երևանի քաղաքապետարանի միջև համագործակցության ամրապնդման գործում ունեցած ավանդի համար, ինչպես նաև Երևանի օրվա կապակցությամբ, ՀՀ ոստիկանության պետ Վլադիմիր Գասպարյանի հրամանով Երևանի քաղաքապետ Տարոն Մարգարյանը պարգևատրվել է «Համագործակցության համար» մեդալով: Այս մասին տեղեկանում ենք Երևանի քաղաքապետարանի տեղեկատվության և հասարակայնության հետ կապերի վարչության տարածած հաղորդագրությունից։

Ողջունելով Երևանի քաղաքապետին, ՀՀ ոստիկանության պետը բարձր է գնահատել քաղաքապետարանի և անձամբ քաղաքապետ Տարոն Մարգարյանի հետ արդյունավետ համագործակցությունը, ընդգծելով, որ ի դեմս Երևանի քաղաքապետարանի Երևան քաղաքի ոստիկանությունը ունի վստահելի գործընկեր. «Համագործակցության սերտացման սկիզբը, որ դրվել է Ձեր ղեկավարման հենց առաջին իսկ օրից, երկուստեք պարտավորեցնող է և, ըստ այդմ, մենք պետք է անենք հնարավորը, որպեսզի մայրաքաղաքում հասարակական կարգի պահպանման, ինչպես նաև քաղաքն առավել ընկալելի դարձնելու հարցում համագործակցությունն էլ ավելի սերտացնենք»,- նշել է Վլադիմիր Գասպարյանը:

Շնորհակալություն հայտնելով գնահատանքի համար, քաղաքապետ Տարոն Մարգարյանն իր հերթին վստահեցրել է, որ Երևանի քաղաքապետարանի և ՀՀ ոստիկանության սերտ համագործակցությունը լինելու է շարունակական. «Մեր առաջնային նպատակը անվտանգ քաղաք ունենալն է և այս հարցում իսկապես մեծ դերակատարում ունի ոստիկանությունը, ինչը չնկատել ուղղակի անհնար է: Քաղաքապետարանի որդեգրած քաղաքականությունն ունի մեկ նպատակ' հասարակական կարգի ապահովման հարցում ևս մեր քաղաքի բնակիչների համար ստեղծել հարմարավետ միջավայր: Ես վստահ եմ, որ մեր համատեղ արդյունավետ համագործակցության արդյունքում հնարավորություն կունենանք պահպանել ու առավել գեղեցկացնել համայն հայության մայրաքաղաքը: Շնորհակալություն եմ հայտնում ՀՀ ոստիկանության ողջ անձնակազմին և անձամբ Ձեզ պարոն Գասպարյան, գնահատանքի և արդյունավետ համագործակցության համար»,- նշել է Տարոն Մարգարյանը: