Տիգրան Ավինյանի «նախազգուշական խայթոցները»` Փաշինյանին և ՔՊ-ին

Երևանի ավագանու արտահերթ նիստում նախկին փոխվարչապետ Տիգրան Ավինյանը նշանակվեց Երևանի փոխքաղաքապետ։ Քվեարկությանը մասնակցել է ավագանու 46 անդամ։ 44 կողմ, 0 դեմ, 2 ձեռնպահ ձայներով Տիգրան Ավինյանը ստանձնեց Երևանի փոխքաղաքապետի պաշտոնը։ 

Ավինյանի ելույթը, սակայն, բավական ուշագրավ տողատակեր էր պարունակում: Եթե մի կողմ դնենք պաթոսը, Երևանին ծառայելու նրա ցանկությունը, ապա  պետք է արձանագրենք, որ նորաթուխ փոխքաղաքապետի ելույթում առկա էին լավ քողարկված կսմիթներ գործող քաղաքապետ Հրաչյա Սարգսյանի հասցեին: Դիցուք՝ Ավինյանը հայտարարեց, որ  նորմալ չէ, երբ քամուց պոկվում է 2021 թվականին կառուցված դպրոցի տանիքը, պարզից էլ պարզ է, որ եթե շինարարարության նորմերին չեն հետևել, ապա այստեղ այսպես թե այնպես առկա է քաղաքապետի` չասենք մեղքը, սակայն բացթողումը:

Մեկ այլ դրվագում Ավինյանը հայտարարեց, որ չենք կարող ասել նոր ավտոբուսները բերեցինք և խնդիրներն ավարտվեցին, դեռ շատ հարցեր կան լուծելու: Մինչդեռ Հրաչյա Սարգսյանը վերջին շրջանում շատ էր պարծենում այն հանգամանքով, որ Երևան քաղաքում տրանսպորտային ռեֆորմի հեղինակը հենց ինքն է:

Ուշագրավ մեկ այլ դրվագ էլ տեղի էր ունեցել օրեր առաջ, երբ Եռաբլուրում կարմիր բերետավորները բացահայտ ապօրինի և բռնի գործողություններ էին կատարել զոհված զինծառայողների մայրերի հանդեպ: Այդ դեպքից ժամեր անց գրառում կատարեց Մալաթիայի թաղապետ Սաշա Կատվալյանը: «Եռաբլուրում որևէ ակցիայի իրականացումը երբևէ չեմ ընդունել ու չեմ ընդունի։ Եռաբլուրը քաղաքական խաղերի, կոչերի ու բողոքի վայր չի եղել ու չպիտի լինի։ Այսօր ոստիկանական ուժերը գործել են առնվազն ոչ պրոֆեսիոնալ և շատ վատ ձևով բերման են ենթարկել զոհվածների մայրերին։ Որպես Արցախյան պատերազմում զոհվածի որդի եմ ասում` ոստիկանության գործելաոճը սխալ էր ու դատապարտելի։ Տղե՛րք, կարմիր գծեր կան, որ չպետք է անցնել»,-գրել էր նա: Այս գրառումը միանշանակ ողջունելի է, սակայն հարց է առաջանում` սա առաջին նման դեպքը չէր, ինչո՞ւ է վարչական շրջանի ղեկավարը հենց հիմա հանդես գալիս քննադատությամբ: Մամուլը բազմիցս էր գրել, որ Կատվալյանը հանդիսանում է Տիգրան Ավինյանի մտերիմը. կարո՞ղ ենք ենթադրել, որ այս գրառման միտքը հուշել է հենց նորաթուխ փոխքաղաքապետը...

Ինչպես երևում է` թեև Ավինյանն ընտրվեց փոխքաղաքապետ, այնուամենայնիվ նրա վերջնական ճակատագիրը դեռևս հայտնի չէ, ներթիմային գզվրտոցը շարունակվում է կենսենսուսի բացակայության պայմաններում և դա է, կարծես թե, ստիպում Ավինյանին` իր թիմակիցների և Փաշինյանի գլխավոր հենարան ոստիկանության հանդեպ հանդես գալ նման նախազգուշական խայթոցներով...