Կրեմլը հասկացնում է Փաշինյանին, որ փայլուն հասկանում է թե՛ այս նյութի բուն նպատակը, թե՛ ծրագրերը

Վարչապետ Նիկոլ Փաշինյանի ընտանիքին պատկանող «Հայկական ժամանակում» երկրորդ անանուն հոդվածն է հրապարակվել՝ կրկին «Հավաստի աղբյուր» ստորագրությամբ։ «Ինչ է ուզում Ռուսաստանը․ ի գիտություն Վեհափառ հայրապետի, երեք նախագահների և փորձագիտական հանրության» վերտառությամբ հրապարակման հեղինակը, որը ենթադրաբար ինքը՝ Նիկոլ Փաշինյանն է, աշխարհաքաղաքական վերլուծությանը զուգահեռ՝ տարբեր մեղադրանքներ է ներկայացնում Ռուսաստանի հասցեին՝ այդ թվում՝ ադրբեջանական, ինչպես նաեւ Հայաստանում տեղակայված ռուսական զորքերը Հայաստանի դեմ օգտագործելու վերաբերյալ։ 

Հոդվածի անկյունաքարային  միտքը այն է, որ Ռուսաստանը Հայաստանից համարյա ուզում է այն, ինչ ուզում է Ուկրաինայից, որ այն դառնա «Ռուսաստան-Բելառուս» միութենական պետության կամ Ռուսաստանի մաս։ Ու եթե Ուկրաինայի դեպքում նման արդյունքի համար ՌԴ-ն օգտագործում է ռուսական և գուցե բելառուսական զորքերը, Հայաստանի դեպքում օգտագործում է Ադրբեջանի և որոշ չափով էլ ՀՀ-ում տեղակայված ռուսական զորքերը։

Ինչ խոսք, հասկանալի է, իհարկե, թե ով է Փաշինյանի ընտանեկան թերթի հավաստի աղբյուրը, և դրանից էլ արդեն պարզ է դառնում, որ Փաշինյանը որոշել է բացել բոլոր խաղաքարտերը և գնալ վա-բանկ: Այս մահացու մեղադրանքով, որը վարչապետի ընտանեկան կայքը հնչեցնում է Կրեմլի հասցեին փաստացի ապագա էսկալացիայի կամ գուցե նաև լայնածավալ պատերազմի և այնուհետև՝ կապիտուլյացիայի մեղավոր է նշանակվում Ռուսաստանը: Եվ սա պատահական չէ: Այս մարտավարությունը ամբողջությամբ տեղավորվում է Փաշինյանի՝ Ռուսաստանին Հարավային Կովկասից և հատկապես Հայաստանից դուրս մղելու քաղաքականության տրամաբանության մեջ, քաղաքականություն, որը վերջին օրերին ավելի քան ցայտուն է դարձել: Ինչ արժեն միայն Փաշինյանի վերջին հարցազրույցը, որի ժամանակ նա հնչեցնում է միտքը, որ ՀԱՊԿ-ն ինքը կարող է դուրս գալ Հայաստանից, դրան հաջորդում է ԱԽ քարտուղարի այցը Բրյուսել և հանդիպումը ՆԱՏՕ-ի բարձրաստիճան պաշտոնյաների հետ: Ակնհայտ է, որ Փաշինյանն սկսում է բաց խաղալ և խաղն էլ իր հերթին դառնում է էլ ավելի վտանգավոր թե՛ Հայաստանի, թե՛ Արցախի համար: Ինչո՞ւ:

Եթե Ադրբեջանի հետ կնքվի խաղաղության համաձայնագիրը, ապա ռուսական խաղաղապահ զորախումբը պետք է դուրս բերվի Արցախից: Իր հերթին, եթե կարգավորվում են Հայասան- Թուրքիա հարաբերությունները՝ 102-րդ ռազմաբազայի գտնվելը Հայաստանում կորցնում է իր ակտուալությունը: Երկու սցենարն էլ ավելի քան մոտ են իրականությանը, օրեր անց կկայանա Փաշինյան-Էրդողան հանդիպումը, իսկ հաջորդ ամիս արդեն իսկ, ըստ փորձագիտական շրջանակների, պատրաստ կլինի խաղաղության համաձայնագրի տեքստը, որի մասին, ի դեպ, ՀԺ-ն երեկ էր արտահոսք կազմակերպել՝ հենվելով վստահելի աղբյուրի վրա:

Ամեն ինչ գնում է նրան, որ Փաշինյանը իրականացնի Արևմուտքի ծրագիրը՝ ՌԴ-ին տարածաշրջանից դուրս մղելու նպատակով: Ինչպես երևում է՝ Փաշինյանը ցանկանում է, թե Ադրբեջանի հետ, թե Թուրքիայի հետ հարաբերությունների կարգավորման պրոցեսը իրականացնել Բրյուսելի և ԱՄՆ-ի հովանու ներքո: Մոսկվան, ի դեպ, արդեն իսկ արձագանքել է Փաշինյանի ընտանեկան թերթի այս հրապարակմանը, մասնավորապես ՌԴ նախագահի մամուլի խոսնակ Դմիտրի Պեսկովը հերթական հիմարություն է անվանել այդ տեղեկությունները: Թե ինչու հերթական՝ պարզ է, առաջին դեպքը չէ, երբ Փաշինյանի այս կամ այն հայտարարությունից հետո Մոսկվան ստիպված է լինում արձագանքել և հերքել ՀՀ վարչապետին: Ըստ էության, Կրեմլը հասկացնում է Փաշինյանին, որ փայլուն հասկանում է թե՛ այս նյութի բուն նպատակը, թե՛ ծրագրերը, որոնք փայփայում է Նիկոլ Փաշինյանը...