Աճուրդի է հանվել Էլվիս Փրեսլիի Լոս Անջելեսի տունը

Ռոքնռոլի արքան՝ Էլվիս Փրեսլին, Լոս Անջելեսի իր տանը բնակվել է գրեթե 10 տարի:

Տունը, որում մոտավորապես կես դար առաջ ապրել է երգիչը, կկարողանա գնել ռոքնռոլի և նրա արքայի յուրաքանչյուր երկրպագու, մի պայմանով՝ եթե նա ունենա 13 մլն դոլար:

Բևերլի Հիլսում գտնվող տունը՝ 45 սենյակով և 5 լոգասենյակներով, Էլվիսը և Պրիսցիլլան նախ վարձել էին, ապա՝ 1967-ին՝ գնել: Նրանք այնտեղ ապրեցին մինչև իրենց բաժանումը՝ 1973 թվականը: Դրանից հետո տունը վարձակալվել է ամսական 25.000 ԱՄՆ դոլարով:

Ի դեպ, տնից բացվում է բնության  և Խաղաղ օվկիանոսի տեսարանը: Գրում է kp.ru -ն:

Ինչպես հանրահայտ Գրեսլենդը Մեմֆիսում, այնպես էլ Լոս Անջելեսի տունը ռոքնռոլի արքայի երկրպագուների համար ուխտագնացության վայր է: Բավական է միայն ասել, որ դարպասները, որոնք պարբերաբար մաքրվում են, հիմա էլ ծածկված են նրանց անուններով և ստորագրություններով:

Հիշեցնենք, որ այս տարվա օգոստոսին լրացավ Էլվիս Փրեսլիի մահվան 35-րդ տարելիցը:

Այդ օրը հավաքվել էր ավելի քան 75.000 երկրպագու, որոնց միացավ երգչի նախկին կինը՝ Պրիսցիլլան և դուստրը՝ Լիզա-Մարլին: