The Huffington Post. Սերժ Թանկյան. Իմ ժողովրդի տխրությունն է նման երանգ տալիս իմ ձայնին

The Huffington Post-ը հրապարակել է ամերիկահայ հանրահայտ ռոք երաժիշտ Սերժ Թանկյանի հարցազրույցը, որում վերջինս խոսել է իր նոր ալբոմի, իր կյանքում երաժշտության դերի, ինչպես նաև անթերի աշխարհի վերաբերյալ իր պատկերոցումների մասին:

Երաժիշտն ասում է, որ իր նոր Harakiri ալբոմը ստեղծելիս նա իսկապես թափառում էր մայրցամաքների, լանդշաֆտների ու նախագծերի մեջ: «Ես միանգամից չորս ձայնագրությունների վրա էի աշխատում: Դրանք մեկը մյուսից տարբեր էին, և դա նպաստեց, որ նախագծերից յուրաքանչյուրն իսկապես հետաքրքիր լինի: Ես կասեի՝ Harakiri-ն ամենահեշտ ձայնագրված ալբոմն է եղել իմ կյանքում: Այն ստեղծելիս ես չէի մտածում, թե ինչ եմ ասում, կամ ինչպիսի երաժշտական ուղեկցություն էր պետք դրան»:

Խոսելով երաժշտության մասին՝ Թանկյանը նշում է, որ երաժշտությունը ֆենոմենալ գործառույթներ ունի. զվարճացնելը հիանալի բան է, պարելը հիանալի գործառույթ է: Դա այնքան հոյակապ, ներշնչող և ներըմբռնողական երևույթ է: Թանկյանը կարծում է, որ այդ գործառույթներից մեկն էլ լուսաբանելն է այն ժամանակը, որում մենք ապրում ենք, պատմել մեր ժամանակների մի շարք ճշմարտությունների մասին, ոգեշնչել մարդկանց ավելի դրական փոփոխությունների համար:

Լրագրողի այն հարցին, թե ինչ ազդեցություն է ունեցել Թանկյանի անցյալը նրա ձայնի վրա, Թանկյանը պատասխանել է. «Կարծում եմ, որ իմ ձայնում կա որոշակի տխրություն, որը ներառված է իմ ժողովրդի՝ հայ ժողովրդի մեջ է, քանի որ 600 տարի նրանք ապրել են Օսմանյան կայսրության տիրապետության տակ՝ որպես երկրորդ կարգի քաղաքացիներ: Կարծում եմ՝ Ցեղասպանությունը և այդ ամենն է, որ նման երանգ են տալիս իմ ձայնին»:

Վերջապես խոսելով իդեալական աշխարհի իր տեսության մասին՝ Թանկյանն ասել է, որ եթե կարողանար մի բան ստեղծել, որին կհավատային բոլորը, դա մարդկանց միջև կապ կստեղծեր: Եթե յուրաքանչյուրը փոխկապված լինի այլ էակների, այլ մարդկանց, կենդանիների, շրջակա միջավայրի հետ՝ անկախ իրենց մշակույթից, ռասսայից կամ կրոնից, եթե բոլորը հավատային փոխկապվածությանը, աշխարհն ավելի լավը կլիներ: