ԱՄՆ-ի իշխանությունները վերադարձրել են 42 տարի առաջ կորած նկարը

ԱՄՆ-ի իշխանությունները վերադարձրել են տիրոջը՝ հայտնի նյույորքյան կոլեկցիոներ Լեո Կաստելիի այրուն, 42 տարի առաջ անհետացած «Էլեկտրական լար» նկարը։ 1961 թվականին այն ստեղծվել էր ամերիկյան փոփ-արվեստի հիմնադիրներից մեկի՝ Ռոյ Լիխտեյնշտեյնի կողմից։ Այս մասին երեքշաբթի օրը հայտնում է ИТАР-ТАСС-ը։

Նկարիչը վաճառել էր իր աշխատանքը Կաստելիին 750 դոլարով։ 1970-ին կտավը հանձնվել էր վերականգնման, ինչից հետո անհետ կորել էր։ Այս տարվա օգոստոս ամսին կտավը հայտնաբերել էին Նյու-Յորքի պահեստներից մեկում։ Ըստ փորձագետների՝ այս ստեղծագործության գինն այժմ կազմում է մոտ 4 մլն դոլար։

2007 թվականին Կաստելիի այրին՝ Բարբարան, որին և ժառանգաբար փոխանցվել էր կտավը, գրանցել էր այն որպես կորած։ Այս տարվա հունիս ամսին նա զանգ ստացավ ոստիկանությունից՝ խնդրանքով հաստատել կտավի իսկությունը։

Նշենք, որ Լիխտեյնշտեյնը համարվում է ամերիկյան փոփ-արվեստի ամենավառ ներկայացուցիչներից մեկը։ Աճուրդներում այս արվեստագետի կտավների համար հսկայական գումարներ են առաջարկում։ Լիխտենշտեյնի ամենանշանավոր սետղծագործությունը՝ «Քնած աղջիկը», Sotheby's աճուրդում վաճառվել է 44,8 մլն դոլարով։