Վրաստանի խորհրդարանը մերժել է «օտարերկրյա գործակալների» օրինագիծը

Վրաստանի խորհրդարանը երկրորդ ընթերցմամբ մերժել է «Օտարերկրյա ազդեցության թափանցիկության մասին» օրինագիծը, որը հայտնի է՝ որպես «օտարերկրյա գործակալների մասին» օրենք։ Ուրբաթ օրը՝ մարտի 10-ի լիագումար նիստում, օրինագծին դեմ է քվեարկել 35, կողմ՝ մեկ պատգամավոր։ Նիստին, ընդհանուր առմամբ, մասնակցել է 112 պատգամավոր։

 Հանդիպումը տևել է մի քանի րոպե, հաղորդում է «Ինտերֆաքս» գործակալությունը։ Առաջին ընթերցմամբ հաստատված նախաձեռնությունները չեն կարող հետ կանչվել միայն դիմումի հիման վրա։ Այդ կապակցությամբ՝ փաստաթուղթը ներկայացվել է երկրորդ լսման։

«Օտարերկրյա գործակալների գրանցման մասին» օրենքի նախագիծը «Ժողովրդի ուժը» հասարակական շարժումը հետ է կանչել խորհրդարանից։

Նախաձեռնողները վստահեցնում էին, որ «Օտարերկրյա ազդեցության թափանցիկության մասին» օրինագիծը ԱՄՆ օրենք է, սակայն ընդդիմությունը և Վրաստանում ԱՄՆ դեսպան Քելի Դեգնանը նշել են, որ փաստաթուղթը դրա հետ կապ չունի։ Նրանց կարծիքով՝ ներկայացված օրինագիծը կրկնել է «օտարերկրյա գործակալների» մասին ՌԴ օրենսդրության հիմնական դրույթները։

«Վրաստանն այդ օրենքների կարիքը չունի: Վրաստանն արդեն ունի ֆինանսական օգնության բավարար պաշտպանվածություն և թափանցիկություն, ինչը ծառայում է վրաց ժողովրդի շահերին»,- ընդգծել է Դեգնանը:

Դիվանագետի խոսքով՝ այժմ Վրաստանի ժողովուրդը կարող է ևս մեկ անգամ պահանջել, որ «կառավարությունը կատարի իր խոստումը», որ երկիրը դառնա ԵՄ անդամության թեկնածու։

Մարտի 7-ին և 8-ին Թբիլիսիում հազարավոր մարդիկ բողոքի ակցիա են անցկացրել օրինագծի դեմ, որի ժամանակ բախումներ են տեղի ունեցել ոստիկանների և ցուցարարների միջև։