Այն, ինչ չէր կարելի Հովիկ Աբրահամյանին, թույլատրվում է Նիկոլ Փաշինյանին և ՔՊ-ին

Ընդդիմադիր Նիկոլ Փաշինյանը իր հայտարարություններում բազմիցս էր մեղադրում գործող իշխանություններին պետական բյուջեն մսխելու և հարկատուների գումարները քամուն տալու մեջ: Տարիներ առաջ աղմկոտ սկանդալ էր հասունացել այն բանից հետո, երբ Հովիկ Աբրահամյանի կառավարությունը շուրջ 1 միլիոն դրամով կոնյակ էր գնել: Ընդդիմադիրները, բնականաբար, դա անվանեցին թալան:

Իսկ ի՞նչ է այսօր կատարվում արդեն վարչապետ Նիկոլ Փաշինյանի կառավարությունում. արդյո՞ք հարկատուների գումարները այսօր չեն մսխվում նմանատիպ ճոխությունների վրա: ԱԺ աշխատակազմը 10 մլն 752 հազար դրամի կոնյակ է գնել։ Գնումը կատարվել է մեկ անձից գնման ընթացակարգով՝ «Վինո վինո» ՍՊԸ-ից։ Ընդհանուր գնվել է 480 շիշ կոնյակ, որից 160 հատը՝ «Ախթամար», 1 միավորի գինը՝ 14 հազար 160 դրամ, «Հայաստան»՝ 60 շիշ, միավորի գինը՝ 18 հազար 960 դրամ, «Վասպուրական»՝ 60 շիշ, միավորի գինը՝ 25 հազար 279 դրամ, «Նաիրի»՝ 50 շիշ, միավորի գինը՝ 39 հազար 440 դրամ, «Երեւան»՝ 60 շիշ, միավորի գինը՝ 21 հազար 439 դրամ, «Էյփրիքոթ»՝ 70 շիշ, միավորի գինը՝ 8 հազար 200 դրամ, եւ «Արարատ Շառլ Ազնավուր 25»՝ 20 շիշ, միավորի գինը՝ 100 հազար դրամ։ Նախորդ տարի նույն նպատակների վրա ԱԺ-ն 14 միլիոն դրամ էր ծախսել:

ՀՀ ՊԵԿ-ը 391,500 դրամի ներկայացուցչական ծառայություններ է գնել Ա/Ձ Սիրվարդ Բաղդասարյանից:  Վարչապետի աշխատակազմը 34,976,000 դրամի միջոցառումների կազմակերպման ծառայություններ «ԲՐԻԴՋ» ՍՊԸ-ից: ՀՀ դատական դեպարտամենտը 244,080 դրամի Քուռ, հայկական չոր կարմիր գինի է գնել «Արտեքսիմ» ՍՊԸ-ից: ՄԻՊ աշխատակազմը 671,000 դրամի ներկայացուցչական ծառայություններ է գնել «Անի Պլազա Հոթել» ՓԲԸ-ից: ԱԳՆ-ն 801,000 դրամի ներկայացուցչական ծառայություններ է ձեռք բերել «ԼԵՎԵԼ ՍՊԸ»-ից:

Ստացվում է, որ այն, ինչ չէր կարելի Հովիկ Աբրահամյանին և վերջինիս կառավարությանը, կարելի է Նիկոլ Փաշինյանին և ՔՊ-ին...