Ռուս բարձրաստիճան պաշտոնյաներ են հանդիպել որդեկորույս ծնողներին. ի՞նչ զարգացումներ են սպասվում Հայաստանում

Զոհված զինծառայողների ծնողներն անժամկետ նստացույց են հայտարարել Կառավարության շենքի մոտ: 44-օրյա պատերազմում զոհված զինծառայող Ժորա Մարտիրոսյանի մոր՝ Գայանե Հակոբյանի կալանավորման որոշումը բորբոքել էր ծնողներին, դատարանի որոշումից հետո, ի նշան բողոքի, նրանք կարճ ժամանակով փակել էին Արշակունյաց պողոտան, ապա երթով շարժվել Մաշտոցի պողոտա, ինչից հետո՝ Կառավարական շենք։

Գայանե Հակոբյանի կալանավորումից հետո հանրային լայն կոնսոլիդացիա է սկսվել զոհված զինծառայողների ծնողների շուրջ և քաղաքացիական դժգոհության այս ալիքը ունի քաղաքական լայնածավալ շարժման վերածվելու իրական պոտենցիալ: Եվ կարծես թե այդ միտումները նկատելի են նաև Հայաստանից դուրս:

ԼՈւՐԵՐ.com-ի տեղեկություններով օրերս զոհված զինծառայողների ծնողների հետ են հանդիպել հատուկ այդ նպատակով Հայաստան ժամանած ռուս բարձրաստիճան պաշտոնյաները, ովքեր նույնպես հասկանում են, որ բողոքի այս ալիքը կարող է ունենալ ձնագնդիկի էֆեկտ, նույնիսկ վերածվել Արցախյան երկրորդ շարժման և որպես հետևանք՝ հանգեցնել իշխանափոխության: Այս սցենարը էլ ավելի հավանական է դառնում Փաշինյանի՝ երեկ ասուլիսի ընթացքում հնչեցրած հերթական հայտարարությունների ֆոնին, որոնք լուրջ ռեզոնանս են առաջացրել Արցախի և Հայաստանի քաղաքական դաշտում: 

Թե գործնականում ինչ արդյունք կունենան ռուս բարձրաստիճան պաշտոնյաների հանդիպումները որդեկորույս ծնողների հետ՝ ցույց կտա ժամանակը, սակայն, ակնհայտ է, որ իրադարձությունները մտնում են վճռական փուլ և ըստ այդմ քաղաքական դաշտում կարող են կտրուկ և անսպասելի շրջադարձեր տեղի ունենալ: