ՌԴ և Իրանի ԱԳ նախարարները քննարկել են Կովկասում վերջին զարգացումները

Ռուսաստանի արտգործնախարար Սերգեյ Լավրովը հայտարարել է, որ Ռուսաստանի Դաշնությունը կասկածներ չունի Իրանի Իսլամական Հանրապետության տարածքային ամբողջականության և անկախության վերաբերյալ և լիովին հարգում է այն։

ԻՌՆԱ-ի հաղորդման համաձայն, Իրանի և Ռուսաստանի արտաքին գործերի նախարարներ Հուսեյն Ամիր Աբդոլլահիանը և Սերգեյ Լավրովը հեռախոսազրույցում քննարկել են երկկողմ և տարածաշրջանային հարցեր, ինչպես նաև երկրների տարածքային ամբողջականությունը հարգելու անհրաժեշտությունը։

Կողմերը նշել են, որ երկու երկրների միջև հարաբերությունները վերելք են ապրում, և ընդգծել են տարբեր ոլորտներում համագործակցությունն էլ ավելի զարգացնելու իրենց ցանկությունը։ Նրանք քննարկել են նաև Կովկասում տեղի ունեցող վերջին զարգացումները և իրենց շահագրգռվածությունն են հայտնել տարածաշրջանային խորհրդակցությունների հետագա զարգացմամբ, ինչպիսին է 3+3 ձևաչափը։

Զրույցի ընթացքում քննարկվել է չորս երկրների՝ Իրանի, Ռուսաստանի, Թուրքիայի և Սիրիայի արտգործնախարարների երկրորդ հանդիպման անցկացման հարցը։

Կողմերն ընդգծել են նաև երկու երկրների միջև բարեկամական հարաբերությունները հարգելու և պահպանելու անհրաժեշտությունը և քննարկել են Իրանի ու Ռուսաստանի միջև ռազմավարական համաձայնագրի մշակման վերջին փուլերը։