Ուր են և ինչու են լռում Հայաստանի խոշոր գործարարներն ու պաշտոնյաները. մաս 2. Սամվել Ալեքսանյան

ԼՈւՐԵՐ.com-ը շարունակում է ներկայացնել այն պաշտոնյաների և գործարարների շարքը, որոնք երկար տարիներ պետական պաշտոններ զբաղեցնելով հանդերձ, Արցախում և Հայաստանում ստեղծված իրավիճակի ֆոնին պահպանում են քար լռություն և նախընտրում են մնալ ստվերում:

Այս անգամ մեր անդրադարձը ՀՀԿ-ական նախկին պատգամավոր, գործարար Սամվել Ալեքսանյանի մասին է: 2016 թվականին Ալեքսանյանը հայտարարում էր, որ քառօրյայի ժամանակ մեկնել էր Արցախ, իսկ ռազմական գործողությունների ավարտից հետո իր անձնական օգտագործման «Lexuse» մակնիշի ավտոմեքենան նվիրեց  զորամասի հրամանատարներից մեկին՝ չմոռանալով նշել, որ այդ մեքենայի արժեքը 80-100 հազ. դոլար է: Ալեքսանյանը զորամասերում հյուրասիրություններ էր կազմակերպում և մի քանի ֆուռ օգնություն ուղարկում բնակչությանը: Հայրենիքի պաշտպանության ժամանակ զոհված կամ հաշմանդամ դարձած զինծառայողներին և նրանց ընտանիքներին աջակցելու օրինագծի ընդունումից հետո Ալեքսանյանը հայտարարեց, որ բանակին ավելի շատ է օգնելու: Բաշ-Ապարանի հերոսամարտի օրն էլ ամեն տարի քեֆ-ուրախություն էր կազմակերպում՝ նշելով, որ իր պարտքն է համարում լինել հերոս ժողովրդի թոռների ու ծոռների կողքին:

Սերժ Սարգսյանի ձեռամբ Ալեքսանյանը անգամ  «Հայրենիքին մատուցած ծառայությունների համար» 2-րդ աստիճանի շքանշանով է պարգևատրվել՝ «Հայոց ցեղասպանության 100-րդ տարելիցին նվիրված միջոցառումների կազմակերպման եւ անցկացման աշխատանքներին ցուցաբերած գործուն աջակցության համար»:  Այժմ, երբ ցեղասպանություն է արդեն Արցախում, Ալեքսանյանը, կարծես, մոռացել է, որ մեդալները միայն զարդ չեն, այլ պարտավորեցնում են սկզբունքային դիրքորոշում ունենալ կարևորագույն հարցերում: 2020 թվականի կապիտուլյացիայից մինչ այս պահը, երբ Նիկոլ Փաշինյանը վերջնականապես է հանձնում Արցախը՝ Սամվել Ալեքսանյանը գեթ մեկ անգամ չի հայտնել իր դիրքորոշումը ստեղծված իրավիճակի վերաբերյալ, չի քննադատել այդ քաղաքականությունը և արցախցիներին օգնության ձեռք չի մեկնել: Փոխարենը՝ նա օգնում է վարչապետի ընտանեկան հիմնադրանին՝ փոխանցելով վերջինիս 230 հազար դոլար:

Շարունակելի...