Ի՞ նչ գին է վճարելու Հայաստանը՝ Փաշինյանի արևմտյան կտրուկ շրջադարձի դիմաց

Նիկոլ Փաշինյանը, արդեն հինգ տարուց ավելի զբաղեցնելով Հայաստանի վարչապետի պաշտոնը, այդպես էլ չի կարողանում կողմնորոշվել, թե իրականում ինչ արտաքին քաղաքականություն է վարում, ուր է տանում Հայաստանը:

Փաշինյանը Ռուսաստանին անուղղակի մեղադրում է Հայաստանին դավաճանելու համար։ Վարչապետը կիրակի կեսօրին ուղերձով դիմել է հայ ժողովրդին ու ընդգծել, որ դաշնակիցները ՀՀ-ի անվտանգությանը սպառնացող գործընթացներում անգործություն են ցուցաբերել, իսկ այժմ էլ, ըստ Փաշինյանի, ավելի ու ավելի մեծ ջանքեր են գործադրում՝ հարվածի տակ դնելով ներքին անվտանգությունն ու կայունությունը։ Թեև Փաշինյանը որևէ պետության անուն չի տվել, ոչ էլ անվտանգային դաշինքի, սակայն ակնհայտ է, որ խոսքը Ռուսաստանի Դաշնության, ՀԱՊԿ-ի և ԵՏՄ-ի մասին է, քանի որ նրա հիշատակած օրինակներն ուղիղ առնչություն ունեն Մոսկվայի ստանձնած պարտավորությունների հետ։ Փաշինյանը հիշեցրել է Խծաբերդի, Փառուխի դեպքերը, Արցախի բնակչության ահաբեկումը, ադրբեջանական վերջին հարձակումը՝ նշելով, որ այս ամենը լրջագույն հարցեր են բարձրացնում Արցախում ՌԴ խաղաղապահ զորախմբի գործունեության և մոտիվների վերաբերյալ։

Այսօր էլ մի շարք այսպես կոչված` սորոսական ՀԿ-ներ, այնպիսիք, ինչպիսիք են «Իրազեկ քաղաքացիների միավորում»-ը,  Հելսինկյան քաղաքացիական ասամբլեայի Վանաձորի գրասենյակը, Ժուռնալիստների «Ասպարեզ» ակումբը, «Համայնքային համախմբման և աջակցության կենտրոն» ՀԿ-ն, «Իրավունքի Եվրոպա միավորում» ՀԿ-ն, «Ազատ քաղաքացի» ՀԿ-ն, «Խաղաղության երկխոսություն» ՀԿ-ն, «Փինք» իրավապաշտպան ՀԿ դիմել են ՀՀ կառավարությանը կոչ անելով դուրս բերել Հայաստանը ՀԱՊԿ-ից, իսկ ռուսական 102-րդ բազան էլ՝ Հայաստանից: Բացի այդ նրանք պահանջում են, դադարեցնել ռուսաստանյան հեռուստաալիքների վերահեռարձակումը ապահովող հայ-ռուսական պայմանագրերի գործողությունը, իսկ կաբելային հեռարձակում իրականացնող օպերատորներին պարտադրել՝ իրենց ցանցերից անջատել ռուսաստանյան բոլոր այն հեռուստաալիքները, որոնք հակահայաստանյան, հակահայկական բացահայտ կամ քողարկված պրոպագանդա են սփռում, հաղորդում են ՀՀ պետականությունը, ինքնիշխանությունը վարկաբեկող, նվաստացնող արտադրանք,

Ակնհայտ է, որ սա Փաշինյանի կիրակնօրյա ասուլիսի տրամաբանական շարունակությունն է և այսպիսով Փաշինյանը հանրային հենք է ստեղծում դեպի Արևմուտք իր շրջադարձը ժողովրդական պահանջ ներկայացնելու համար: Փաշինյանը արդեն անթաքույց թեքվել է դեպի Արևմուտքը և դա արել է մեծամասամբ սեփական իշխանությունը պահպանելու ցանկությունից դրդված, քանի որ Հայաստանին որևէ կոնկրետ անվտանգային ապահովման առաջարկներ արևմուտքի կողմից չեն հնչել, իսկ ահա Փաշինյանի անձնական անվտանգությունը նրանք թերևս կարողանան ապահովել: Պայմանով, իհարկե, որ վերջինս էլ դուրս կբերի Հայաստանը ՌԴ ազդեցության տակից: Անշուշտ, Մոսկվայից ստացվող մեսիջները վկայում են այն մասին, որ Կրեմլը Հարավային Կովկասից որևէ տեղ չի պատրաստվում հեռանալ, իսկ սա էլ իր հերթին նշանակում է, որ Փաշինյանը իր քաղաքական ամբիցիաների պատճառով զոհաբերելով Արցախը, այժմ էլ գնում է անչափ ռիսկային մի ճանապարհով՝ Հայաստանը դարձնելով ՌԴ-արևմուտք բախման օջախ: