Վրաստանի խորհրդարանում ընթանում է նախագահի իմփիչմենթի գործընթացը

Վրաստանի խորհրդարանի նախագահ Շալվա Պապուաշվիլին հայտարարել է նախագահ Սալոմե Զուրաբիշվիլիի նկատմամբ իմփիչմենթի գործընթաց սկսելու մասին, այն կսկսվի հանրապետության ղեկավարի կողմից երկրի Սահմանադրության խախտման վերաբերյալ բանավեճով, գրում են միջազգային ԶԼՄ-ները։

«Խորհրդարանական հանդիպմանը մասնակցելու հրավեր է ուղարկվել նախագահ Սալոմե Զուրաբիշվիլիին: Իմպիչմենտի քննարկման ավարտից հետո այդ հարցը կդրվի քվեարկության», - լրագրողներին ասել է Պապուաշվիլին:

Իշխող «Վրացական երազանք» կուսակցության առաջնորդ Իրակլի Կոբախիձեն լրագրողներին ասել է, որ Զուրաբիշվիլին «կոպտորեն խախտել է Սահմանադրությունը, և դա չի կարող աննկատ մնալ»։

Միաժամանակ, նա նշել է, որ Զուրաբիշվիլիի իմպիչմենտի իրականացումը «գրեթե զրոյի է հասցվել», քանի որ խորհրդարանական մեծամասնությունը պատգամավորների անհրաժեշտ ձայները չունի։

Խորհրդարանական ընդդիմության ներկայացուցիչները, ովքեր հայտարարել են քվեարկությանը չմասնակցելու մասին, իշխող կուսակցության նախաձեռնած նախագահի իմպիչմենտը անվանում են «կրկեսային շոու» ​​և Վրաստանի ներքին և արտաքին բազմաթիվ խնդիրները կոծկելու փորձ։