Վրաստանի վարչապետը ներողություն է խնդրել Չինաստանի դեսպանից նախագահի խոսքերի համար

Վրաստանի վարչապետ Իրակլի Ղարիբաշվիլին Թբիլիսիում Չինաստանի դեսպան Չժոու Ցզյանի հետ հանդիպմանը ափսոսանք է հայտնել նախագահ Սալոմե Զուրաբիշվիլիի՝ Չինաստանի նախագահ Սի Ծինփինի վերաբերյալ խոսքերի համար։ Այս մասին հայտնել է Վրաստանի կառավարության մամուլի ծառայությունը։

Ֆրանսիական LCI հեռուստաալիքին տված հարցազրույցում Զուրաբիշվիլին ավելի վաղ ասել էր, որ պատմական արդյունք կլինի, եթե երբևէ դատապարտվեն Ռուսաստանի և Չինաստանի առաջնորդներ Վլադիմիր Պուտինը և Սի Ծինփինը։ Միաժամանակ նախագահը նշել էր, որ դա իրատեսական չի համարում։

«Վարչապետն ափսոսանք է հայտնել Վրաստանի նախագահի հայտարարության կապակցությամբ և հույս հայտնել, որ նախագահի հայտարարությունը չի ազդի կամ վնասի Վրաստանի ու Չինաստանի միջև հարաբերությունների չափազանց դրական պատմական դինամիկային»,- ասված է հաղորդագրությունում։

Չինաստանի դեսպանի հետ հանդիպմանը Ղարիբաշվիլին ընդգծել է, որ նախագահի հայտարարությունը «կտրականապես անընդունելի է և վրդովեցուցիչ»։ Նրա խոսքով՝ նման հռետորաբանությունը հակասում է Վրաստանի կառավարության դիրքորոշմանը։ Վարչապետը դեսպանին նաև ասել է, որ Զուրաբիշվիլին «առաջին անգամը չէ, որ գործունեություն է ծավալում սահմանադրության խախտմամբ և ի վնաս պետության շահերի», և հիշեցրել է, որ նրա կողմից սահմանադրության խախտումը պատճառ է դարձել իմպիչմենտի ընթացակարգի համար։