Ռուսաստանի դեմ պատժամիջոցների սահմանումը սեփական ոտքին կրակելու նման բան կլինի․ Պապուաշվիլի

Ռուսաստանի դեմ պատժամիջոցների սահմանումը սեփական ոտքին կրակելու նման բան կլինի, դա գիտեն բոլորը՝ Վրաստանի քաղաքացիները, օտարերկրյա գործընկերները։ Այնպես որ, կարևոր չէ, թե ով է հաստատում այս ճշմարտությունը,- այսպես է մեկնաբանել Վրաստանի խորհրդարանի նախագահ Շալվա Պապուաշվիլին RT–ի գլխավոր խմբագիր Մարգարիտա Սիմոնյանի հայտարարությունը, որի համաձայն՝ «Վրաստանն իրեն զարմանալիորեն ադեկվատ է պահում» պատժամիջոցների հարցում։

Լրագրողների այն հարցին, թե ինչ է նշանակում վրացական իշխանությունների համար, երբ նրանց գովաբանում են ռուսական իշխանությունների ներկայացուցիչները, Պապուաշվիլին պատասխանել է, որ իշխանության համար որոշիչ է միայն Վրաստանի քաղաքացիների կարծիքը։

«Մենք աշխատում ենք, որպեսզի հաճոյախոսություններ ստանանք վրացի ժողովրդից և ուրախացնենք վրաց ժողովրդին: Այն, ինչ ասում են ուրիշները, մեզ չի հետաքրքրում: Հետևաբար, մենք չենք արձագանքում, երբ մեզ անարդարացիորեն քննադատում են, անկախ նրանից, թե ով է դա անում, և չենք արձագանքում, երբ մեզ գովում են անբարյացակամները: Մեզ համար դա նշանակություն չունի, մեզ համար գլխավոր որոշիչ գործոնն այն է, թե ինչ են մտածում Վրաստանի քաղաքացիները, ինչ են քննադատում և ինչն է իրենց դուր գալիս»,- ասել է Պապուաշվիլին։