Նոր հարված՝ հայկական ավանդական ընտանիքին. Փաշինյանը կկատարի Արևմուտքի պահանջը

ՀՀ Ազգային ժողովի «Քաղաքացիական պայմանագիր» խմբակցության 3 կին պատգամավորներ աղմկահարույց նախագծերի փաթեթ են ներկայացրել, որտեղ նսեմացվում է ավանդական ընտանիքի դերը՝ ավելացնելով զուգընկեր տերմինը: Ըստ էության, Զարուհի Բաթոյանը, Սոնա Ղազարյանը եւ Ծովինար Վադանյանը պետության հիմնասյուն համարվող ընտանիքի ձեւակերպումը խեղաթյուրել են: «Ընտանիքում բռնության կանխարգելման, ընտանիքում բռնության ենթարկված անձանց պաշտպանության եւ ընտանիքում համերաշխության վերականգնման մասին» օրենքում փոփոխություններ եւ լրացումներ կատարելու մասին նախագծով փորձ է արվում կանխել ընտանեկան բռնությունը, բայց ընտանիքի սահմանումն ընդլայնված է եւ ավելացել է զուգընկեր եւ զուգընկերուհի հասկացությունները, ինչը, ըստ էության, իր մեջ լրջագույն վտանգ է պարունակում: Ինչպես երևում է՝ ՔՊ-ականները պատրաստվում են նոր Սահմանադրության մեջ ամրագրել նաև գենդերային հավասարության սկզբունքը և ընդունել Ստամբուլյան կոնվենցիան, ինչը, ըստ որոշ տեղեկությունների, պարտադրվում է Արևմուտքի կողմից: Սահմանադրության մեջ գենդերային բազմազանության հասկացության սահմանումը հնարավորություն կտա առանց խոչընդոտների վավերացնել այդ կոնվենցիան:

Գաղտնիք չէ, որ այս իշխանությունների օրոք բավական մեծ տեղ է հատկացվում ԼԳԲՏ համայնքին, սնկի պես աճում են վերջիններիս իրավունքները պաշտպանող և արևմտյան գրանտներով սնվող ՀԿ-ների թիվը, որոնք Ստամբուլյան կոնվենցիայի ակտիվ լոբբինգով են զբաղված վերջին տարիների ընթացքում:  «Կանանց ռեսուրսային կենտրոն» ՀԿ-ի ղեկավար Լարա Ահարոնյանը Հայաստանում իբր պայքարում է կանանց իրավունքների պաշտպանության համար, ընտանեկան բռնության դեմ: Սակայն իրականում նրա գործունեության բուն նպատակը փոքր-ինչ այլ է: «Հասարակություն առանց բռնության» ՀԿ անդամներն այս հարցում հետ չեն մնում: «Իրավունքի կողմ» իրավապաշտպան ՀԿ-ն 2020թ. մարտի 1-3-ը տրանս ճամբար է կազմակերպում տրանս անձանց, տրանս ակտիվիստների և տրանս անձանց ընտանիքի անդամների համար։ Նշենք, որ տրանսգենդերների խնդիրներով զբաղվող «Իրավունքի կողմ» իրավապաշտպան ՀԿ-ի հիմնական աջակիցը և ֆինանսավորողը հանդիսանում է «Նոր Սերունդ» մարդասիրական ՀԿ-ն, որը ֆինանսավորվում է Սորոսի հիմնադրամից ֆինանսավորվող Հելսինկյան քաղաքացիական ասամբլեայի կողմից, որի վանաձորյան գրասենյակի ղեկավարը հանդիսանում է իրավապաշտպան Արթուր Սաքունցը: «Նոր Սերունդ» ՀԿ-ի ֆինանսավորողներն են նաև USAID-ը, Հայաստանում Չեխիայի Հանրապետության դեսպանատունը, Նիդերլանդների Թագավորությունը և այլն: «Իրավունքի կողմ» իրավապաշտպան ՀԿ-ն նաև համագործակցում է «Քաղաքացիական պայմանագիր» կուսակցության հոգաբարձուների խորհրդի անդամ Լարա Ահարոնյանի՝ «Կանանց ռեսուրսային կենտրոն» ՀԿ-ի հետ, որի հիմնական ֆինանսավորողը կրկին «Բաց հասարակության հիմնադրամներ-Հայաստանն» է (Սորոսի հիմնադրամ): 

Ինչպես տեսնում ենք՝ իշխող քաղաքական թիմը հերթական անգամ Արևմուտքի պահանջները կատարելու և Արևմուտքին հաճոյանալու նպատակով հարվածի տակ է դնում հայ ինքնությունն ու ազգային արժեքները, ավանդական ընտանիքն ու մեր բոլորիս երեխաների ապագան: