Իրակլի Կոբախիձեն դարձել է Վրաստանի վարչապետի թեկնածու

Վրաստանում իշխող կուսակցությունը ներկայացրել է վարչապետի թեկնածուին։ «Վրացական երազանքի» համագումարում թեկնածու է ընտրվել Իրակլի Կոբախիձեն, ով զբաղեցնում էր կուսակցության նախագահի պաշտոնը, փոխանցում է ՌԻԱ Նովոստին։

«Կոբախիձեն ստացել է լիակատար աջակցություն»,- համագումարի քվեարկության արդյունքներից հետո հայտարարել է կուսակցության նախագահ Իրակլի Ղարիբաշվիլին։ Այսպիսով, Կոբախիձեն իր տեղը փոխեց Իրակլի Ղարիբաշվիլիի հետ, ով վերջերս թողեց վարչապետի պաշտոնը և ստանձնեց կուսակցության նախագահի պաշտոնը։

Վրաստանի խորհրդարանը հաջորդ շաբաթ պետք է վստահություն հայտնի վարչապետի թեկնածուին և նրա կառավարությանը։ Վստահություն ձեռք բերելու համար անհրաժեշտ է ստանալ պատգամավորների՝ 150 ձայնից 76-ը։

 Վրաստանի կառավարությունում ռոտացիան տեղի է ունեցել ծրագրված խորհրդարանական ընտրություններից ինը ամիս առաջ, որոնք նշանակված են հոկտեմբերի 26-ին։ Խորհրդարանական ընտրություններն առաջին անգամ կանցկացվեն միայն համամասնական ընտրակարգով։

Սա Վրաստանի ղեկավարության առաջին կադրային փոփոխություններն են այն բանից հետո, երբ «Վրացական երազանքի» հիմնադիր Բիձինա Իվանիշվիլին երրորդ անգամ վերադարձավ քաղաքականություն՝ դառնալով քաղաքական ուժի պատվավոր նախագահը։