Տիգրան Ավինյանի և ՔՊ-ի հերթական անակնկալ «նվերը»՝ երևանցիներին

Երևանի ավագանու իշխանական հատվածը տրանսպորտի թանկացման նախագիծ է մշակել։ Համաձայն դրա՝ տրանսպորտի համար ներրդվելու է միասնական տոմսային համակարգ, և դրա շրջանակներում տրանսպորտի ուղեվարձը կարող է թանկանալ՝ հասնելով ընդհուպ 260 դրամ:

Ուշագրավ է, որ «Ասեք, կանենք»  կարգախոսով ավագանու ընտրություններին մասնակցած ՔՊ-ն ու Տիգրան Ավինյանը նախընտրական արշավի ընթացքում համեստորեն լռել են թե՛ կարմիր գծերի վճարը, թե՛ հանրային տրանսպորտի ուղեվարձը թանկացնելու իրենց ցանկության մեջ: Ավելին՝ քաղաքապետարանից պարբերաբար հայտարարում էին, որ նման քննարկումներ անգամ չեն ընթանում։ Իսկ ահա ընտրվելուց հետո Ավինյանն ու իր թիմը երևանցիներին կանգնեցնում են փաստի առաջ, ընդ որում նրանք մոռացել են անգամ սեփական խոստումը՝ քաղաքային նշանակության հարցերը տեղական հանրաքվեներով որոշելու մասով, և չեն ցանկացել վերը նշված նախագիծն անգամ հավուր պատշաճի հանրային քննարկման ներկայացնել:

Ավինյանն ու ՔՊ-ն իրենց այնպես են պահում, կարծես թե, կատարել են երևանցիներին տված բոլոր խոստումները ու այժմ էլ իրավունք ունեն խոսեն որոշ ծառայությունների թանկացման մասին՝ բարեփոխել են տրանսպորտային ցանցը, մարդիկ այլևս ժամերով չեն կանգնում կանգառներում, խցանումներն ի սպառ վերացել են, սպասարկման որակն էլ շեշտակի ավելացել: Այս ամենը, իհարկե, տեղի չի ունեցել, դրան էլ գումարած քաղաքապետարանը ձախողեց քաղաքի ձնամաքրման աշխատանքները՝ Երևանը վերածելով մի մահաբեր սահադաշտի ու դեռ մի բան էլ մեղադրելով երևանցիներին, թե վերջիններիս հավուր պատշաճի չեն մաքրում իրենց բակերն ու մայթերը;

Ժամանակին նման թանկացումների դեմ պայքարողները հայտարարում էին, որ հանրային տրանսպորտի ուղեվարձի անգամ 50 դրամ թանկացումը լուրջ հարված է երևանցու գրպանին, եթե չասենք՝ թալան է: Ընդդեմ տրանսպորտի ուղեվարձի պայքարի առաջամարտիկներից շատերն այսօր բարձր պաշտոններ են զբաղեցնում: Դիցուք՝  պատգամավոր Լենա Նազարյանը նախկինում «Վճարում ենք 100 դրամ» սոցիալական շարժման ակտիվ մասնակից էր, բայց այսօր չի էլ ցանկանում մեկնաբանել իր թիմակից քաղաքապետի որոշումները: Ինչպես տեսնում ենք՝ նախկինում ակտիվիստ, այսօր արդեն պետական պաշտոններ զբաղեցնող անձինք մոռացել են, թե ինչի համար էին տարիներ առաջ պայքարում, այն ինչ ժամանակին նրանք անվանում էին թալան և հարված՝ երևանցիների գրպանին, այսօր համարվում է սպասարկման որակի բարելավում և անխուսափելի քայլ: Կարող ենք փաստել, որ եթե Ավինյանն ու նրա թիմը մինչ ընտրություններն անկեղծ լինեին երևանցիների հետ և բացեին բոլոր խաղաքարտերը, ապա, դժվար թե, հավաքեին անգամ այն չնչին տոկոսները, որոնք ի վերջո հաջողեցին հավաքել: