ԵՄ-ն հրապարակավ հրաժարվեց Հայաստանին անվտանգության երաշխիքներ տրամադրել

Հայաստանի հետ համատեղ զորավարժություններ անցկացնելու ծրագիր չկա, քանի որ ԵՄ-ն ռազմական դաշինք չէ, այլ քաղաքական և տնտեսական արժեքների վրա հիմնված կառույց։  Այս մասին հայտարարել է ԵՄ ներկայացուցիչ Պիտեր Ստանոն։ «Եվրամիությունը չի նախատեսում նաև անդամ երկրների տարածքում վերապատրաստել հայ զինվորականներին»,- ասել է նա։ Խոսելով հայկական բանակին անզեն աջակցություն ցուցաբերելու հնարավորության մասին՝ Ստանոն ասել է, որ այս առնչությամբ դեռ կոնկրետ որոշում չի կայացվել։

Ուշագրավ է, որ ԵՄ պաշտոնյան անում է նման հայտարարություններ Երևանում իշխանական շրջանակներում տիրող էյֆորիայի ֆոնին: Իսկ էյֆորիան պայմանավորված է նրանով, որ ըստ այդ շրջանակների՝ Հայաստանը նվազեցնելու է անվտանգության ոլորտում կախվածությունը ՌԴ-ից՝ ի հաշիվ Արևմուտքի հետ համագործակցության և Արևմուտքից սպասվող օգնության: Այժմ ԵՄ պաշտոնյան հայտարարում է, որ Հայաստանին որևէ ռազմական օգնություն կառույցը չի պատրաստվում տրամադրել: Ավելին, ակնհայտ դիսոնանս է առաջանում հատկապես այն հայտարարությունից, որ ԵՄ-ն չի նախատեսում անդամ երկրների տարածքում վերապատրաստել հայ զինվորականներին: Հիշեցնենք, որ Ֆրանսիան, որը ԵՄ անդամ  է, նման նպատակների մասին է հայտարարել, հայկական կողմն էլ տիրաժավորում էր այդ հայտարարությունը՝ ցույց տալով, որ անվտանգության և ռազմական ոլորտներում դիվերսիֆիկացիան արդեն իսկ իրականություն է: Ինչպես տեսնում ենք՝ շաբաթն ուրբաթից շուտ է եկել և այժմ ԵՄ-ն ամենաբարձր մակարդակով փաստացի հրաժարվում  է Հայաստանին տրամադրվելիք անվտանգության երաշխիքների մասով պատասխանատվություն ստանձնելուց: