ՔՊ-ական պատգամավորը «պադստավկա է արել» Փաշինյանին

Իշխանության ներկայացուցիչները շարունակում են ամեն կերպ սահմանափակել ազատ խոսքի իրավունքն ու վատթարացնել ԶԼՄ-ի գործունեության պայմանները: Արցախի ու Հայաստանի անվտանգության, երկրի սահմանների պաշտապանության, աղետալի պատերազմի հետեւանքով առաջ եկած ու չլուծված, բանակն օր առաջ վերազինելու հարցերը թողած՝ Նիկոլ Փաշինյանի թիմակիցերը, խոսքները մեկ արած, թևքերը քշտել, լրագրողներին են անցել: Մինչդեռ իրենց իսկ նախընտրական խոստումներից մեկն էլ վերաբերվում էր նրան, որ գալով իշխանության՝ ՔՊ-ականներն անելու են ամեն հնարավորն ու անհնարը լրագրողների իրավունքները պաշտպանելու, թափանցիկ աշխատելու համար, իսկ խոսքի ազատությունը ժողովրդավարական Հայաստանի այցեքարտն է լինելու: Նիկոլ Փաշինյանը հայտարարում էր, որ մամուլն այսօր Հայաստանում ազատ է, քան երբևէ։

Բայց, արի ու տես, որ ՔՊ-ական պատգամավոր Լիլիթ Մինասյանը որոշեց մի նախագիծ առաջ քաշել, ըստ որի՝ պետական գերատեսչությունները կարող են որոշել՝ լրատվամիջոցը ներկայացնող լրագրողներից ով կարող է հավատարմագրվել պետական կառույցում, ով՝ ոչ: Ավելին՝ ցանկացած պահի հղում անելով կարգապահական ինչ-ինչ դրույթների՝ կարող են դադարեցնել լրագրողի հավատարմագրումը: Իսկ սա իր հերթին նշանակում է, որ իշխանությունները պարզապես ցանկանում են սահմանափակել անկախ լրագրողների և ընդդիմադիր մեդիան ներկայացնող ԶԼՄ-ի աշխատակիցների մուտքն այս կամ այն պետական կառույց, արդյունքում՝ կաշխատեն միայն օրվա իշխանություններին հլու հնազանդ ծառայող ԶԼՄ-ի հետ: Արդյո՞ք սա է ՔՊ-ի խոստացած խոսքի ազատությունը, եթե այո, ապա պետք է ի սկզբանե անկեղծ լինեին իրենց ընտրողների հետ, այլ ոչ թե  գեղեցիկ և պոպուլիստական խոստումներ շռայլեին: Ակնհայտ է, որ նման նախագիծ առաջ քաշելով և դրա ընդունման լոբբինգը անելով, պատգամավորը «պադստավկա է արել» Փաշինյանին, ով, ըստ էության, տրամագծորեն հակառակ խոստումներն էր տալիս: