Անկախ Հայաստանում բացահայտվեց սովետական կրիմինալը

Առավոտ էր։ Սովետի կրիմինալ առավոտներից մեկը։ Սամվել Տ.-ն, խոշոր չափի վնաս հասցնելով գյումրեցի Անդրանիկ Գ.-ին, չէր էլ պատկերացնում, որ 22 տարի անց իր մասին կխոսեն անկախ Հայաստանում։

1990-1991 թվականներին Ներքին գործերի նախարար Կառլոս Ղազարյանի օրոք 1990-ի հոկտեմբերի 20-ին կատարված գողությունը 22 տարի անց բացահայտվում է ՀՀ ոստիկանապետ Վլադիմիր Գասպարյանի օրոք։

«Սովետի թվին» կատարված հանցագործությունը, անցնելով երկար ճանապարհ, շրջանցելով այդ ընթացքում Ներքին գործերի (ՆԳ նախարարությունը 2003թ. հունվարի 1-ից վերակազմավորվեց ՀՀ ոստիկանության) 8 ղեկավարների ձեռքի տակով՝ հասավ իր եզրագծին, եզրագիծ, որին իր կյանքի 22 տարիների ընթացքում ոստիկանների հետ միասին ձգտել էր հասնել գյումրեցի Անդրանիկ Գ.-ն։ Անդրանիկը, կորցնելով իրեն պատկանող «Մոսկվիչ 2140» մակնիշի ավտոմեքենայի անվադողերը, լուսարձակները, դիմապակին և դիմապակին մաքրող սարքերը, հույսը չէր կորցնում և վստահելով ոստիկանությանը՝ պայքարում էր նրանց հետ միասին։

Եվ ահա փլուզելով սովետը և հիմնելով Հայաստանի անկախությունը, անցնելով մութ ու ցուրտ տարիների դժվարին ճանապարհը՝ 2012 թվականի նոյեմբերի 27-ին օպերատիվ-հետախուզական միջոցառումների շնորհիվ պարզվեց, որ այդ դարակազմիկ գողությունը կատարել է 1945 թ. ծնված Սամվել Տ.-ն:

Այս գործը նույնիսկ չի հաջողվել բացահայտել ՀՀ գործող նախագահ Սերժ Սարգսյանի գլխավորած Ներքին գործերի նախարարությունը։

Այսքան տարի անց՝ հիմա էլ պետք է ընթանա նախաքննություն, այնուհետև՝ հետաքննություն, այնուհետև՝ դատական նիստեր, և այսպես շարունակ։

Այս գործը քննվել է այս նախարարների օրոք.

Աշոտ Մանուչարյան (1991 թ. մարտ-1991 թ. դեկտեմբեր),

Վալերի Պողոսյան (1991թ դեկտեմբեր-1992 թ.փետրվար),

Վանո Սիրադեղյան (1992 թ. փետրվար-1996 թ. նոյեմբեր),

Սերժ Սարգսյան (1996 թ. նոյեմբեր-1999 թ. հունիս),

Սուրեն Աբրահամյան (1999 թ. հունիս-1999 թ. նոյեմբեր),

Հայկ Հարությունյան (1999 թ. նոյեմբեր-2003 թ. հունվար, 2003 թ.
հունվարից մինչեւ 2008 թ. մայիս՝ ՀՀ ոստիկանության պետ),

Ալիկ Սարգսյան (2008 թ. մայիսի 29-ից մինչև 2011 թ. նոյեմբերի 1-ը՝ ՀՀ ոստիկանության պետ):

2011-ի նոյեմբերի 1-ից ՀՀ ոստիկանության պետը Վլադիմիր Գասպարյանն է:

Ստորև ներկայացնում ենք Ոստիկանության հաղորդագրությունը տվյալ հանցագործության վերաբերյալ.

«Շուրջ 22 տարի առաջ՝ 1990 թ. հոկտեմբերի 20-ին, ոստիկանության Գյումրիի բաժնում հաղորդում էր ստացվել, որ գողացել են Գյումրի քաղաքի բնակիչ, 1960 թ. ծնված Անդրանիկ Գ.-ին պատկանող «Մոսկվիչ 2140» մակնիշի ավտոմեքենայի անվադողերը, լուսարձակները, դիմապակին և դիմապակին մաքրող սարքերը:

Երեկ՝ նոյեմբերի 27-ին, ոստիկանության ծառայողների ձեռնարկած օպերատիվ-հետախուզական միջոցառումների շնորհիվ պարզվել է, որ այդ գողությունը կատարել է 1945 թ. ծնված Սամվել Տ.-ն: Կատարվում է նախաքննություն»:

Ազա Արասխանյան