Գնանք սաունա, համ էլ՝ կլողանանք

Սաունաները, ինչպես հայտնի է, հայաստանյան իրականության մեջ իրենց ի հայտ գալու օրվանից խիստ որոշակի գործառույթ են իրականացնում: Իհարկե, դա բոլորովին չի նշանակում, թե սաունա չեն գնում նաև լողանալու համար, այդպիսի բացառություններ էլ են լինում և կան մարդիկ, որ կարող են օգտվել նման հաստատություններից զուտ հիգիենիկ նկատառումներով: Բայց քանի որ սաունաների հիմնական գործառույթն այլ է և ավելի քան եկամտաբեր է, ըստ այդմ, Երևանի քաղաքապետարանը հարկ չի էլ համարել առանձնապես համեստություն անել և բոլորին հայտնի իրողությունը գաղտնի պահել. ընդհակառակը, քանի որ բոլորը գիտեն, թե ինչի համար են գնում սաունա, բիզնեսն էլ ավելի քան եկամտաբեր է, էլ ի՞նչ կարիք կա փակագծերը չբացել և դրանից գոնե օգուտ չքաղել:

Այսօր Երևանի ավագանու խորհրդի նիստն ընդունել է Երևանում տեղական տուրքերի 2013թ. դրույքաչափերը, որտեղ սաունաների գործունեության իրական բնույթն ավելի քան պատկերավոր է ներկայացված: Այսպես, «առևտրի, հանրային սննդի, զվարճանքի, շահումով խաղերի և վիճակախաղերի կազմակերպման օբյեկտները, բաղնիքները (սաունաները), խաղատները ժամը 24:00-ից հետո աշխատելու թույլտվության համար տեղական տուրքն ընթացիկ տարվա համար սահմանվում է՝

Առևտրի օբյեկտների համար՝ 87 500 դրամ, հանրային սննդի և զվարճանքի օբյեկտների համար՝ 175 000 դրամ, բաղնիքների (սաունաների) համար՝ 875 000 դրամ, խաղատների կազմակերպման համար՝ 1 750 000 դրամ, շահումով խաղերի կազմակերպման համար՝ 875 000 դրամ, վիճակախաղերի կազմակերպման համար՝ 262 000 դրամ»:

Ինչպես տեսնում ենք, պատկերն ավելի քան խոսուն է։ Ամենաթշվառ վիճակում առևտրի օբյեկտներն են. ենթադրվում է, որ գիշերով մարդիկ հիմնականում քնում են, այնպես որ առևտուր անող չկա: Հանրային սննդի ու զվարճանքի օբյեկտներն էլ այս առումով առանձնապես չեն փայլում աշխուժությամբ, որից հետո դրույքաչափերը շեշտակիորեն աճում են, երբ խոսքը վերաբերում է բաղնիքներին կամ խաղատներին: Հենց այստեղ է, որ, ըստ էության, պաշտոնական մակարդակով հաստատվում է սաունա կոչվածների իսկական գործառույթը՝ այլապես հարց կարող էր ծագել, թե ժամը 24:00-ից հետո ինչը կարող է ստիպել մարդուն գնալ սաունա և անպայմանորեն շոգեհարվել քնելուց առաջ:

Ի դեպ, ՀՀ-ում պաշտոնապես հասարակաց տներ չկան։ Դեռևս իշխողն այն մտայնությունն է, որ մեր նման «նամուսով» ազգը չի կարող նման «աննամուս» հաստատություններ թույլատրել: Իսկ սաունաները... դե, դրանք «նամուսով» ազգի հիգիենայի հարցերն են լուծում... այնպես որ, այս առումով հարցերն ավելորդ են:

Լուսինե Կեսոյան