Ոստիկանությունը զա՞նց կառնի վարչապետի հրահանգը

Կառավարության այսօրվա նիստում վարչապետ Տիգրան Սարգսյանն արդեն ցուցում-հրահանգի տեսքով ոստիկանությանն իջեցրեց մինչ այդ «Lurer.com»-ի բարձրացրած հարցի լուծումը: Մենք ներկայացրել էինք Ճանապարհային ոստիկանության տեսանկարահանող սարքերի գրանցած իրավախախտումների ծանուցումների հետ կապված բարդությունները, այն, որ ծանուցման տեղ չհասնելու դեպքում այն եռապատկվում է, հետո հնգապատկվում, հետո արդեն քաղաքացու նկատմամբ կարող է հետախուզում հայտարարվել: Մեր բարձրացրած հարցը ոստիկանությունն ընդունեց սվիններով և սկսեց բարոյախրատական քարոզներ կարդալ, թե իրենք անքննելի են, իրենց ճանապարհները՝ անիմանալի: Մենք զգուշացրել էինք ոստիկանությանը, որ ճանապարհային ոստիկանության նման քաղաքականությունը շատ լուրջ բունտի հիմք է դառնալու: Եվ ահա, այն, ինչ այդպես էլ հասու չեղավ ոստիկանությանը, փաստորեն, ընկալվել էր վարչապետի կողմից: Ըստ երևույթին, հենց իր վարած քաղաքականության հետևանքով մշտապես քննադատության թիրախ դարձող Տիգրան Սարգսյանը սկսել է հասկանալ, որ իր հեղինակության վրա բացասաբար են ազդում նաև իր ենթակաների, անգամ կառավարությանն առընթեր մարմինների վատ աշխատանքը և որ բոլոր դժգոհությունները վերջնարդյունքում գումարվում են իրար, դեռ մի բան էլ բազմապատկվում և ուղղվում կոնկրետ երկրի բարձրագույն ղեկավարների հասցեով՝ լինի վարչապետ, թե նախագահ:

Երեկ «Մայքրոսոֆթ»–ի կենտրոնի բացման ժամանակ երիտասարդ մասնագետները Տիգրան Սարգսյանին էին ներկայացրել մի ծրագիր, որը հնարավորություն է տալու ավտոմեքենայի նկարահանվելուց և խախտման «արժանանալուց» անմիջապես հետո վարորդին հաղորդագրություն ուղարկել: «Վերջինս ոչ միայն իմանում է, որ իր խախտումն արձանագրվել է, այլև՝ թե որքան է վճարելու։ Ծրագիրն արդեն պատրաստ է, մնում է այն ներառել տվյալների շտեմարան», - բացատրում էր վարչապետը երիտասարդ մասնագետների գրած ծրագրի նրբությունները։

Փոխոստիկանապետ Արթուր Օսիկյանը, ոստիկանության ոգուն համահունչ, փորձեց առարկել վարչապետին, ըստ երևույթին, մտադրություն ունենալով, մեր հանդեպ կիրառած բարոյախրատական քարոզները մի անգամ էլ գործածության դնել: «Դե, մենք փոստային ծառայության միջոցով ենք ծանուցում»,- վարչապետին առարկեց ոստիկանապետի տեղակալը: Վարչապետը մի անգամ էլ փորձեց բացատրել, որ հեռախոսային հաղորդագրություն ուղարկելն ավելի ստույգ է, ավելի հեշտ: Օսիկյանը դարձյալ անդրդվելի էր. «Լավ, կտեսնենք, ուղարկեք, կքննարկենք»: Վարչապետն արդեն չդիմացավ. «Էլ ի՞նչ քննարկեք, ծրագիրն արդեն պատրաստ է, կվերցնեք, կներդնեք»:

Իսկ այդ ժամանակ փոխոստիկանապետը զեկուցում էր հենց այն մասին, որ «ճանապարհային ոստիկանության ընթացիկ տարվա արտաբյուջետային միջոցների նախահաշվի 9 ամսվա արդյունքով էապես գերակատարվել է եկամտի ծրագիրը, ինչը պայմանավորված է երթևեկության կանոնների պահպանման հսկողության ավտոմատ համակարգի ներդրմամբ և որ կառավարությունը որոշել է գերակատարմամբ ստացված գումարի մի մասը տրամադրել նշված համակարգի առաջանցիկ զարգացմանը։ Մասնավորապես, սարքերի և սարքավորումների ձեռքբերմանը կուղղվի մոտ 1 մլրդ 300 մլն դրամ, համակարգի պահպանման և սպասարկման աշխատանքին՝ մոտ 145 մլն դրամ»։

Թե ինչ գումարներ է այս ընթացքում աշխատել ճանապարհային ոստիկանությունը, անգամ ճանապարհային ոստիկանությունում երևի թե կարգին չգիտեն: Այսօրվա փոփոխությամբ (եթե, իհարկե, ոստիկանությունում զանց չառնեն վարչապետի ցուցումը), վարորդները գոնե կխուսափեն տուգանքների հնգապատկումից: Ի դեպ, ոչ պաշտոնական խոսակցության ընթացքում վարչապետի մամուլի խոսնակ Հարություն Բերբերյանն էլ, պարզվեց, արդեն մի քանի անգամ տուգանվել է, իսկ վերջին տուգանքը հենց ծանուցում չստանալու պատճառով հնգապատկվել է ու դարձել 125 000 դրամ: