Գիտաժողով` «Որակյալ ուսուցման հիմնախնդիրները ՀՀ հանրակրթական դպրոցներում»

Այսօր մեկնարկել է ՀՀ կրթության և գիտության նախարարության և «Մանկավարժական նախաձեռնություն» հայկական ասոցիացիա հասարակական կազմակերպության համատեղ երկօրյա գիտաժողովը, որին մասնակցել են կրթության ոլորտի պատասխանատուներ և մանկավարժներ: Գիտաժողովի բացմանը ներկաներին ողջունել է ՀՀ կրթության և գիտության նախարարի տեղակալ, «Մանկավարժական նախաձեռնություն» կազմակերպության գիտական ղեկավար, խորհրդի նախագահ Մանուկ Մկրտչյանը, ով նշել է, որ դեռևս 90-ականների կեսերին հիմնված մանկավարժների ակումբի ակունքում, որը հետագայում վերածվել է ասոցիացիայի, կանգնած են եղել հանրապետության լավագույն մանկավարժներից շատերը, ովքեր իրենց նորարար մոտեցումներով և մեթոդիկաներով նպաստել են կրթության ոլորտի զարգացմանը:

«Մանկավարժական նախաձեռնություն» ասոցիացիայի գործունեության վերաբերյալ հաշվետվությունը ներկայացրել է ասոցիացիայի նախագահ Վահրամ Ղազարյանը, ով նշել է, որ ասոցիացիայի նպատակն է նպաստել հանրապետության կրթական համակարգի հետագա զարգացմանը` աջակցելով կրթության ոլորտում նորարարական-փորձարարական գործունեության իրականացմանը: Ասոցիացիայի նախագահի փոխանցմամբ` 2010 թվականից առ այսօր կազմակերպության նախաձեռնությամբ իրականացված հանրակրթական ուսումնական հաստատության ղեկավարման իրավունք ունեցող անձանց և ատեստավորման ենթակա ուսուցիչների վերապատրաստման դասընթացների արդյունքում վերապատրաստվել է շուրջ 370 մասնագետ: «Մանկավարժական նախաձեռնություն» ասոցիացիայի իրականացրած քաղաքականության իրագործման և նորարական ակտիվ գործունեության համար ասոցիացիայի պատվոգիր է շնորհվել մի շարք մանկավարժների:

Գիտաժողովի մասնակիցներին իրենց ողջույնի խոսքն են հղել նաև Ռուսաստանի Դաշնության մի շարք մարզերի մանկավարժական կառույցներ:

Գիտաժողովի ընթացքում կայացել է նաև «Մանկավարժական նախաձեռնություն» կազմակերպության խորհրդի նախագահ, գիտական ղեկավար Մանուկ Մկրտչյանի հեղինակած «Ուսուցման կոլեկտիվ եղանակի իրականացման մեթոդաբանական, տեսական և գործնական հարցերը» գրքի շնորհանդեսը:

Գիտաժողովի երկրորդ օրը նախատեսվում են «Որակյալ ուսուցման հիմնախնդիրները ՀՀ հանրակրթական դպրոցներում» սեկցիոն աշխատանքներ, որոնք կկայանան Երևանի թիվ 127 ավագ դպրոցում: