ՀՀ 3 կուսակցությունների անդամակցությունը ԵԺԿ–ին նոր թափ հաղորդեց Հայաստան-ԵՄ երկխոսությանը. ՀՀ նախագահ

Երևանում այսօր տեղի ունեցած Եվրոպական Ժողովրդական կուսակցության Արևելյան գործընկերության առաջնորդների գագաթնաժողովի ավարտին ՀՀԿ նախագահ, ՀՀ նախագահ Սերժ Սարգսյանը, ԵԺԿ նախագահ Վիլֆրիդ Մարտենսը, Եվրոպական հանձնաժողովի նախագահ Ժոզե Մանուել Բարոզոն, Վրաստանի նախագահ Միխեիլ Սաակաշվիլին, Մոլդովայի վարչապետ Վլադ Ֆիլատը գագաթնաժողովի արդյունքներն ամփոփել են զանգվածային լրատվամիջոցների հետ հանդիպման ժամանակ:

Նախագահ Սերժ Սարգսյանի հայտարարությունը Երևանում կայացած ԵԺԿ Արևելյան գործընկերության առաջնորդների գագաթնաժողովի արդյունքների ամփոփման կապակցությամբ.

«Զանգվածային լրատվամիջոցների հարգելի՛ ներկայացուցիչներ,

Այսօր առաջին անգամ Երևանում հյուրընկալել ենք Եվրոպական ժողովրդական կուսակցության և Արևելյան գործընկերների առաջնորդների տարածաշրջանային գագաթնաժողովը: Անցյալ տարի ԵԺԿ Մարսելի գագաթնաժողովում հայաստանյան երեք կուսակցությունների անդամակցությունը այս համաեվրոպական կուսակցությանը պատմական մեծ նշանակություն ունեցող իրադարձություն էր: Եվրոպական մերձեցման կարևորագույն նպատակներից մեկը մեր ժողովուրդների, հասարակությունների, անհատների միջև շփումների խթանումն է: Իսկ այդ հասարակությունների կարևոր մաս են կազմում, ինչ խոսք, նաև քաղաքական կուսակցությունները:

Միջկուսակցական փոխգործակցությունը մեծ նշանակություն ունի եվրոպական քաղաքական մշակույթի տարածման, համաեվրոպական արժեհամակարգի ամրապնդման տեսանկյունից: Մենք կարևորում ենք ԵԺԿ դերակատարումը եվրոպական ինքնության կոնսոլիդացման և Եվրոպական միության գործընկեր երկրների հետ համագործակցության խորացման գործում: Այն նաև մեծ հնարավորություններ է պարունակում միջազգային և միջխորհրդարանական կառույցներում մեր ձայնն ավելի լսելի դարձնելու առումով:

Կցանկանայի շնորհակալություն հայտնել կուսակցության նախագահ պարոն Մարտենսին այն ջերմ ընդունելության համար, որին արժանացան հայաստանյան քաղաքական կուսակցությունները Եվրոպական ժողովրդական կուսակցության մեծ ընտանիքում:

Մեծապես գնահատում եմ Եվրոպական հանձնաժողովի նախագահ Բարոզոյի մասնակցությունը այս գագաթնաժողովին: Պարո՛ն Բարոզո, Ձեր անմիջական մասնակցությունը այս գագաթնաժողովին ևս մեկ ապացույց է առ այն, որ Արևելյան գործընկերության խնդիրներն ու հեռանկարները հանձնաժողովի մշտական ուշադրության կենտրոնում են:

Այսօր մենք քննարկեցինք Արևելյան գործընկերության օրակարգային հարցերը և նախանշեցինք մեր անելիքները մինչև Վիլնյուսի 2013 թվականի Արևելյան գործընկերության գագաթնաժողով: Մենք ընդունեցինք Երևանյան հռչակագիրը, որում արտացոլված է մեր ընդհանուր տեսլականը Արևելյան գործընկերության ապագայի, տարածաշրջանային հիմնահարցերի, ինչպես նաև ԵԺԿ դերակատարության շուրջ:

Արևելյան գործընկերությունը ստեղծվել է որպես ընդհանուր արժեքների շուրջ փոխգործակցության ձևաչափ: Հայաստանի համար այն կարևորվում է ընթացող լայնածավալ բարեփոխումներում եվրոպական լավագույն փորձի ներդրման տեսանկյունից: Համոզված ենք, որ Արևելյան գործընկերության առաքելությունը լիարժեքորեն իրականացված կլինի այն դեպքում, երբ բոլոր գործընկեր երկրները հավասարապես հանձնառու լինեին ժողովրդավարական բարեփոխումներ իրականացնելուն:

Որպես քրիստոնեադեմոկրատական կուսակցությունների ընտանիք՝ Եվրոպական ժողովրդական կուսակցությունը չի կարող հանդուրժել ժողովրդավարական ազատությունների ոտնահարումը, այլատյացությունը, ռազմատենչ հռետորաբանությունը, ուժի կիրառման սպառնալիքները: Այս երևույթները մեր ընդհանուր պատմության ամենամութ էջերի հիշողություններն են արթնացնում:

Մեզ չի կարող չանհանգստացնել այն փաստը, որ Եվրամիության անդամակցությանը ձգտող Թուրքիան շարունակում է արևելյան գործընկեր Հայաստանի ապօրինի շրջափակումը: Համոզված ենք, որ Եվրոպայի այս վերջին փակ սահմանը պետք է բացվի անմիջապես և առանց նախապայմանների: Մենք քննարկում էինք, թե ինչպե՞ս խթանենք Արևելյան գործընկերության պետությունների ժողովրդավարացման գործընթացը, ինչպե՞ս հասու դարձնենք մեր արտադրողների համար եվրոպական սպառողական շուկաները, ինչպե՞ս հեշտացնենք շփումները մեր քաղաքացիների միջև՝ պարզեցնելով, իսկ հետագայում նաև վերացնելով մուտքի վիզաների պահանջները: Դա են ակնկալում մեր պետությունների քաղաքացիները:

Հայաստանի երեք կուսակցությունների անդամակցությունը Եվրոպական ժողովրդական կուսակցությանը նոր թափ հաղորդեց Հայաստան-Եվրոպական միություն երկխոսությանը: Մենք շնորհակալ ենք դրա համար մեր բոլոր գործընկերներին:

Շնորհակալություն»: