Հայոց ցեղասպանությունը՝ ԵԽ հրատարակած մարդու իրավունքների ուղեցույց-դասագրքում

Նոյեմբերի 29-ին Ստրասբուգում տեղի է ունեցել «Կողմնացույց» մարդու իրավունքերի կրթության դասագրքի նոր՝ խմբագրված տարբերակի շնորհանդեսը, որում ապրիլի 24-ը ներառվել է որպես Հայոց ցեղասպանության հիշատակի օր։ Գրքում մի քանի այլ հատվածներում ևս հիշատակվում է Հայոց ցեղասպանությունը: Գրքի էլեկտրոնային տարբերակը հասանելի է նաև հետևյալ հղումով՝ http://eycb.coe.int/compass/en/pdf/compass_2012_inside_FINAL.pdf: Այս մասին տեղեկացրեց իրավաբանական գիտությունների թեկնածու, մարդու իրավունքների կրթության մասնագետ Գաբրիել Բալայանը, որի խոսքով՝ գրքում Հայոց ցեղապանության մասին հիշատակումները ներառելու ուղղությամբ աշխատանքները մեկնարկել էին դեռևս 2010 թ.։

«Երեկ Ստրասբուրգում կայացել է «Կողմնացույց» ԵԽ մարդու իրավունքերի կրթության գրքի վերախմբագրված տարբերակի շնորհանդեսը, որին Հայաստանից մասնակցել է Ներսես Գևորգյանը»,- նշեց Գաբրիել Բալայանը։ Նա ընդգծեց, որ գրքի խմբագրված տարբերակում Հայոց ցեղասպանությունը նշվում է որպես հիշատակի օր, ինչը հնարավոր դարձավ մարդու իրավունքերի պաշտպանության խնդիրներով զբաղվող հայ մասնագետների և նրանց եվրոպական գործընկերների հետևողական ու համատեղ աշխատանքի շնորհիվ:

«Կողմնացույց»-ը հրատարակվում է Եվրոպայի խորհրդի կողմից և կարելի է համարել, որ արտահայտում է ԵԽ պաշտոնական կարծիքը, քանի որ ինչպես գլխավոր խմբագիր Ռուի Գոմեսը, այնպես էլ մյուս խմբագիրները ԵԽ պաշտոնյաներ են:

Գրքի նախաբանը սկվում է ԵԽ գլխավոր քարտուղար Թյոբյորն Յագլանդի խոսքով, որն ավարտվում է հետևյալ տողերով. «Ես հավատում եմ, որ այս նոր ձեռնարկի հրատարակությունը կներշնչի և առաջ կմղի մարդու իրավունքների կրթությամբ զբաղվող մասնագետներին իրենց կարևոր գործունեության մեջ»: Գրքում ներկայացվում են տարբեր գործիքներ և վարժություններ՝ երիտասարդների շրջանում մարդու իրավունքների կրթության համար, որոնք կիրառվում են գրեթե բոլոր երկրներում:

«Կողմնացույցը»-ը սովորաբար թարգմանվում է ԵԽ անդամ պետությունների բոլոր լեզուներով, նախկին հրապարակումը թագմանվել է ավելի քան 30 լեզվով՝ ներառյալ hայերեն, ադրբեջաներեն, թուրքերեն, արաբերեն, ճապոներեն և այլ լեզուները: Ամբողջ ցանկը կարելի է տեսնել հետևյալ հղումով՝ http://eycb.coe.int/compass/other.html: