«168 ժամ». ԱԺ–ն Կառավարության հետ դեռ կքննարկի իր որոշումը

ՀՀ կառավարությունը չի ընդունել Աժ ՀՀԿ խմբակցության` 2013թ. պետական բյուջեում Ազգային ժողովի ֆինանսավորումն ավելացնելու վերաբերյալ առաջարկները: «168 ժամ»-ի թղթակցի հետ զրույցում Աժ Պետաիրավական հանձնաժողովի նախագահ Դավիթ Հարությունյանն ասել է, որ ինքը պետք է նախ լսի կառավարության հիմնավորումները, որովհետև գուցե այլ առաջնահերթություններ են եղել:

Հարցին, թե` ըստ ՀՀ կառավարության պաշտոնական պատասխանի` այդ ծախսային ուղղություններն առաջնահերթ չեն, արդյո՞ք Ձեզ այս պատասխանը բավարարում է, Դավիթ Հարությունյանը պատասխանել է. «Կարծում եմ, մի բան է` ինչ գրված է, մի այլ բան է` ինչ ասվում է: Նրանք, հավանաբար, պատասխանը համառոտ են գրել, բայց մենք դեռ իրենց հետ այս հարցը մանրամասն կքննարկենք: Համենայնդեպս, Կառավարությունը Հանրապետական կուսակցությունն է ձևավորել իր գործընկերոջ հետ, այնպես որ` մենք կպաշտպանենք կառավարության առաջարկած բյուջեն»:

Հիշեցնենք, որ ՀՀԿ-ն առաջարկել էր` արտասահմանյան գործուղումների գծով ծախսերն ավելացնել 50 մլն դրամով, մեքենաների և սարքավորումների ընթացիկ նորոգման ծախսերն ավելացնել 12 մլն դրամով, տրանսպորտային նյութերն ավելացնել 30 մլն դրամով, տրանսպորտային միջոցների ձեռքբերման համար հատկացնել 180 մլն դրամ, աշխատողների աշխատավարձերը և հավելավճարներն ավելացնել 12 մլն դրամով, Աժ նիստերը հեռուստատեսությամբ և ռադիոյով հեռարձակելու նպատակով հատկացնել 80 մլն դրամ: