Reuters. «Սասնա ծռերը» մրցելու է «Դևերի պար»-ի հետ

Հաջորդ շաբաթ կայանալու է ՅՈՒՆԵՍԿՕ-ի մշակութային գործակալության հանդիպումը, որի ժամանակ քննարկվելու է նոր թեկնածուների ոչ նյութական մշակութային ժառանգությունների ցուցակում ընդգրկվելու հարցը, տեղեկացնում է Reuters լրատվական գործակալությունը:

Ամենատարաշխարհիկ թեկնածուների թվում են նաև հայկական էպոսը՝ «Սասնա ծռերը», և վենեսուելական «Դևերի պարը» տոնը: Նշենք, որ այդ ցուցակն ստեղծվել է 2003թ. ՅՈՒՆԵՍԿՕ-ի կողմից՝ նպատակ ունենալով պահպանել աշխարհի արվեստի տարբեր դրսևորումները և մշակութային ծեսերը:

Ընդ որում շեշտվում է, որ այդ պատվին արժանանալու համար մրցում են 51 թեկնածուներ՝ հուսալով, որ այս տարի ՅՈՒՆԵՍԿՕ-ն իրենց կընդգրկի այդ ցուցակի մեջ: Թեկնածուները կգնահատվեն դեկտեկմբերի 3-ից 7-ը, իսկ հաղթողների անունները կհայտարարվեն ամեն օրվա վերջում:

Պետք է մատնանշել, որ պետությունները, չնայած, որ կարող են դիմել կազմակերպության տարեկան 6.5 միլիոն դոլարանոց բյուջեից դրամաշնորհ ստանալու համար՝ փրկելու մահացող պատմական ժառանգությունները, սակայն նրանց մեծ մասը պարզապես ցանկանում է ներառված լինել «ներկայացուցչական ցուցակում», որի համար չկա ոչ մի դրամական օգնություն, բայց այն գրավում է լրատվամիջոցների ուշադրությունն ու ապահովում է ճանաչում:

Նկատենք, որ ՅՈՒՆԵՍԿՕ-ն հայտնի է 40 տարի առաջ ստեղծված իր համաշխարհային ժառանգության ցուցակով, որի մեջ ներառված են ավելի քան 1000 բնական և մշակութային վայրեր, որոնք համարվում են համընդհանուր կարևոր արժեքներ: Վերջերս կազմակերպությունը կենտրոնացել է «ոչ նյութական» մշակույթի վրա, ինչպիսիք են՝ լեզուն և ավանդույթները: