Օսկարի ներկայացված հայկական ֆիլմը՝ Ադրբեջանի հերթական հիստերիայի առիթ

Համաշխարհային «Օսկար» մրցանակաբաշխությանը ներկայացված հայկական «Եթե բոլորը» ֆիլմը ցույց է տալիս, թե ինչպես է մարդկությունը հաղթում նախապաշարմունքներին:

Ֆիլմում կան նաև Ադրբեջանի մասին պատմող դրվագներ, ինչի պատճառով էլ այն երկու ժողովուրդների համար ևս մեկ թունավոր վեճի թեմա է դարձել. հայտնում է «Պատերազմի և խաղաղության լուսաբանման ինստիտուտը» (IWPR):

Ֆիլմում մի տղամարդ օգնում է ռուսահայ աղջկա, որ գնա իր հոր գերեզմանի մոտ ու ծառ տնկի այնտեղ: Հայրը մահացել է Ղարաբաղյան պատերազմում: Այս մասին տեղեկանում ենք «Առավոտ» թերթից:

Ադրբեջանցի գրող Էլչին Հուսեյնաբայլին պնդում է, որ ֆիլմի սցենարը գողացել են իր 2010թ. գրված «Արևից կուրացած» պատմվածքից:

«Պատմությունը, որը ես եմ գրել, այսպիսին է. հիվանդ ադրբեջանցի բժիշկը մտնում է Ղարաբաղի տարածք, որպեսզի կատարի իր պապի ցանկությունը՝ ծառ տնկի նրա տան բակում: Հերոսն ուզում է տեսնել իր հոր գերեզմանը, բայց տարածքը հայերի հսկողության տակ է լինում, և  նրան ձերբակալում են: Սակայն երկար բանակցություններից հետո նրան թույլ են տալիս կատարել իր ցանկությունը,–ասել է ազերի գրողը ադրբեջանական կայքերից մեկին տված հարցազրույցում և եզրափակել,–Նրանք օգտագործել են իմ պատմությունը, սակայն փոխել են իրենց ուզածի պես»:

IWPR -ն զրուցել է «Եթե բոլորը» ֆիլմի սցենարի հեղինակ Միքայել Պողոսյանի հետ, ով ասել է, որ ֆիլմի վրա երկար են աշխատել և ֆիլմի մտահղացումն ավելի շուտ է առաջացել, քան Հուսեյնբայլին տպագրել է իր գործը:

«Ֆիլմի սցենարը գրվել է 2010թ. սկզբներին, իսկ նկարահանումները սկսվել են 2010թ. գարնանը: Մինչ պատմությունը գրելը մենք հանդիպել ենք մարդկանց, ովքեր վերապրել են պատերազմը: Այդ մարդկանց հետ ծանոթանալուց ու խոսելուց հետո էր, որ ստեղծվեց ֆիլմի գաղափարը,–ասել է Պողոսյանը։–Մենք նույն կերպ կարող ենք մեղադրել Ադրբեջանին մեր «Կարոտ» ֆիլմի պատմությունը գողանալու համար, որտեղ գլխավոր հերոսն անցնում է սահմանը, որ իր հայրենիքում մահանա»: