Ոստիկանության դարի բացահայտումը, վարչապետի էվրիկան և Նոնոյի դիպլոմը

Շաբաթ էր, ամսվա շաբաթներից ամենաառեղծվածայինը։ Հենց այդ շաբաթ էր, որ պետք է բացահայտվեր դարի գողությունը, որն արդեն մի քանի տասնամյակ համարվում էր ամենախորհրդավոր, անբացահայտելի հանցագործությունը, որի մասին անգամ արգելվում էր բարձրաձայն մտածել, ուր մնաց խոսել, ու հենց այդ պատճառով է, որ հասարակությունը բացարձակ անտեղյակ է միջադեպից: Վախը մարդկանց ստիպել էր լռել, լռել տարիներով, դարերով և միայն միջադեպից տեղյակներն էին, որ ցածրաձայն, վհուկների պես շշնջում էին իրար ականջի՝ կանխելով սարսափի արհավիրքը, որը կարող էր վերակենդանացնել այդ տարիների անդուր մթնոլորտը:

Անցնում էին տարիները, փոխվում էին ոստիկանները, ոստիկանապետերը, հետաքննիչները, բայց՝ ապարդյուն: Պահը հասունանում էր, և արդեն քննարկվում էին գործը ԿՀՎ ուղարկելու տարբերակները, երբ հանկարծ հանցագործն այսքան տարիներից հետո թույլ տվեց ճակատագրական սխալ, և հենց այդ ժամանակ ոստիկանապետ Վլադիմիր Գասպարյանի ջանքերի, օպերատիվ-հետախուզական միջոցառումների շնորհիվ վերջապես պարզվեց գողի ինքնությունը, չնայած այս երկար ու ձիգ տարիներին նա չէր փոխվել՝ նույն սարսափելի ու վախ ներշնչող դիմագծերը… Ոստիկաններն ուղղակի ապշել էին՝ չհավատալով հազարամյակի իրենց բացահայտմանը, չհապաղեցին, և վայրկյաններ չանցած՝ բարի լուրն արդեն ոստիկանության կայքում էր, այն թնդում էր նաև սոցցանցերում: Բոլորի շուրթերին միայն «Շնորհակալ ենք ձեզ, ոստիկաննե՛ր» արտահայտությունն էր, մանուկից մինչև զառամյալ ծերունի բավարարված էին այսքան տարիների սպասումն ու հույսերն արդարացնելու համար: Եվ միայն նա էր, որ կիտել էր ունքերը, ցավից ու անզորությունից դողալով՝ կրճտացնում էր ատամները։ Բայց ոչ, այս ամենը կապ չուներ ոստիկանների հետ, ուղղակի նա արդեն 67 տարեկան էր, և այս տարիների ընթացքում հասցրել էր մսխել խոշոր չափերի հասնող գողոնը և դրանով իսկ ապահովել իր բարեկեցիկ կյանքը Հայաստանում, այլապես դժվար թե ի վիճակի լիներ գոյատևել այս երկրում՝ առանց «Մոսկվիչ 2140» մակնիշի ավտոմեքենայի անվադողերի, լուսարձակների, դիմապակու և դիմապակին մաքրող սարքերի:

Կատարվում է նախաքննություն, ամենայն հավանականությամբ, հանցագործը կդատապարտվի ցմահ ազատազրկման:

Այս գործում չի կարելի հոստկանյս չծափահարել բարձրագույն կրթությամբ բարձրակարգ ոստիկաններին: Նրանք փայլեցին նաև երևանյան ճանապարհներին իրենց վազանցով և մտքի բարձր թռիչքով և հայերենի գերազանց իմացությամբ. «Լրիվ դու ոնցոր խառնում ես սաղ...»։ Այսքան ընդգրկուն և սահուն, անթերի, հիանալ կարելի է, ահա և լեզվի տեսչության համար վառ օրինակ լեզուն հարստացնելու առումով: Ոստիկանապետն էլ, նկատելով նրանց՝ հայերենի հանդեպ ունեցած սերն ու ի ծնե ունեցած ընդունակությունները, ստիպված նրանց ազատեց աշխատանքից՝ օգնելով նրանց այս կյանքում գտնել իրենց:

Այս շաբաթ բացահայտումներից անմասն չմնաց նաև վարչապետ Տիգրան Սարգսյանը, ով վերջապես ասաց, որ Հայաստանի համար միջազգային շուկա դուրս գալու երկու ճանապարհ կա՝ Իրան և Վրաստան: Եվ այնուհետև, ըստ տրամաբանության, խոսեց պատժամիջոցների մասին ու շեշտեց. «Միջազգային պատժամիջոցները զրոյի են հասցնում Իրանի հետ աշխատելու, այդ թվում՝ տարանցիկ փոխադրումներն իրականացնելու հնարավորությունները»: Վերջապես պարզվեց, որ սա լուրջ խնդիրներ է ստեղծում… Խնդիրները լուծման ճանապարհին են. Խոսրովի արգելոցում ընթանում են տնօրենի ընտրությունները, քննական շրջան, դիպլոմների ներկայացում և այլն: Պարզվեց, որ ամենահավանական թեկնածուն ունի ավելի քան բարձրագույն կրթություն, ազգը ուղղակի ապշած էր նրա համեստությամբ: Գաբրիել Պողոսյանն ավարտել էր Ռոստովի Պետական համալսարանի ինստիտուտը, և ամենայն հավանականությամբ, հենց սրանով էր պայմանավորված նրա՝ հայերեն կարդալ չկարողանալու ընդունակությունը:

Լսելով մեր արգելոցների տնօրենների բարձր մակարդակի մասին՝ Globe spots միջազգային զբոսաշրջային կազմակերպությունը մեզ ընդգրկեց այն երկրների տասնյակում, որտեղ զբոսաշրջիկներին խորհուրդ է տրվում այցելել 2013-ին: Մենք հինգերորդն էինք, իսկ ահա եթե Խոսրովի արգելոցի տնօրենն ունենար, օրինակի համար, Հարվարդի պետական ինստիտուտի Երևանի քոլեջի ուսումնարանի դիպլոմ, ապա մենք միանշանակ կզբաղեցնեինք 1-ին հորիզոնականը:

Իսկ մեր գալիք սերնդի ներկայացուցիչներն Ամստերդամում գրավեցին երրորդ հորիզոնականը՝ առաջին տեղը զիջելով միայն Ղարաբաղի ներկայացուցչին՝ Ուկրաինայի ներկայացուցչին:

Շաբաթվա վերջում էլ տեղի ունեցան խորհրդարանական արտահերթ ընտրություններ: Այս անգամ ևս ընտություններն անցան բացարձակ թափանցիկ ընտրակեղծիքների մթնոլորտում, որից շահեցին միայն մի քանի տաքսի սերվիսներ՝ Միլենա, Զեթ....
Հուսանք՝ այս շաբաթ կարդարացվեն բոլորիս հույսերը, կիրականացվեն նպատակներն ու իղձերը:

Գևորգ Ավետիսյան