Լեգենդար Սյամոն կարող է վերադառնալ Ծառուկյանի միջոցով

ԼՂՀ պաշտպանության բանակի նախկին հրամանատար, նախկինում՝ «Դաշինք» կուսակցության նախագահ, ներկայումս՝ «անհետ կորած» Սամվել Բաբայանը, հնարավոր է, շուտով էլի հայտնվի հայաստանյան քաղաքական երկնակամարում: Լեգենդար Սյամոյի վերադարձի կնքահայրը կարող է լինել ոչ այլ ոք, քան ԲՀԿ առաջնորդ Գագիկ Ծառուկյանը: Մեր տեղեկություններով՝ Բաբայանը վերջին շրջանում ինտենսիվ բանակցությունների մեջ է Ծառուկյանի հետ: Երկու գործիչները մի քանի անգամ հանդիպել են Մոսկվայում, որի ժամանակ էլ, ըստ երևույթին, Բաբայանին հաջողվել է ԲՀԿ առաջնորդին համոզել, որ ինքը քաղաքական լուրջ ֆիգուր է և եթե ինքը դառնա Ծառուկյանի դաշնակիցը, ապա քաղաքական դաշտում շատ բանի կարելի կլինի հասնել:

Սամվել Բաբայանի նման դաշնակից ունենալու համար Ծառուկյանին շատ բան պետք չէ՝ ընդամենը վճարել Բաբայանի պարտքերը՝ այն փողերը, որոնք վերջինս, այսպես ասած, վերցրել ու քցել էր հայաստանյան քաղաքական դաշտի այլ խաղացողներից՝ նրանց էլ որպես երաշխիք որոշակի քաղաքական խոստումներ շռայլելով: Ի դեպ, այդ խոստումների շարքում տեղ էր զբաղեցնում նաև ԲՀԿ-ի՝ կոալիցիայից դուրս գալը, այն, որ Ռոբերտ Քոչարյանն ակտիվ գործողությունների կանցնի, որից հետո Բաբայանն ինչ-ինչ դիրքեր էր գրավելու, այսինքն՝ կարելի է ասել, որ նրա տված երաշխիքներն ինչ-որ տեղ իրակականալու միտում ունեին և դեռ խոստումներ տալու փուլում Ծառուկյանն այդ խոստումների մեջ որոշակի դերակատարում ուներ:

Սամվել Բաբայանին պատկանող «Քարդան սիստեմ» ՍՊԸ-ի գործերն այժմ դատարանում են: Ժամանակին այս ընկերությանն էր պատկանում Հայաստան շինափայտ ներկրելու քվոտան, որը Բաբայանին էր տրվել դեռևս Ռոբերտ Քոչարյանի իշխանության տարիներին: «Քարդան սիստեմ» ՍՊԸ-ն Հայաստան էր ներկրում նաև մեծ քանակությամբ պարարտանյութ՝ սիլիտրա: Քաղաքական շռայլ խոստումներով զուգորդվող գործարքի ի կատար ածման համար Բաբայանը մեծ քանակությամբ անշարժ գույք է գրավ դնում: Գրավադրված է Բաբայանի՝ Նալբանդյան-Թումանյան փողոցների խաչմերուկում գտնվող տունը, Կասկադի վերջում գտնվող անավարտ առանձնատունը, զոքանչի տունը, Ալբերտ Բազեյանի հայրական տունը, Սահմանադրական դատարանի անդամ Կիմ Բալայանի տունը և էլի մի քանի տներ: Ընդհանուր առմամբ, 16 անշարժ գույք՝ բնակարաններ, առանձնատներ, լողավազան և մեկ սրճարան:

«Քարդան սիստեմ» ՍՊԸ-ի՝ դատարանի որոշմամբ հաստատված հիմնական պարտատերը «Արդշինինվեստբանկ» ՓԲԸ-ն է: Ընկերությունը բանկին պարտք է 1 մլն 800 հազար դոլար: Պարտատերերից մեկը խոշոր հարկ վճարողների հարկային տեսչությունն է, «Ապավեն» ընկերությունը, որը պատկանում է Արդյունաբերողների և գործարարների ընկերության նախագահ Արսեն Ղազարյանին: Սրան զուգահեռ՝ երկու պահանջ էլ կա դատարանում, պահանջատերերից մեկը «Եվրոպա» ՍՊԸ-ն է՝ 90 մլն դրամով, մյուսը՝ «Տախմետ» ՍՊԸ-ն՝ 250 մլն դրամ պահանջով:
Հենց այս գումարներն են, որ պետք է փակի Գագիկ Ծառուկյանը՝ Սամվել Բաբայանի դաշնակցությանն արժանանալու համար: Դատելով գումարներից՝ դրանք այնքան էլ առասպելական չեն, բնականաբար, ծառուկյանական չափանիշներից ելնելով, այնպես որ իշխանության համը զգացած ԼՂՀ նախկին տիրակալի վերադարձը բոլորովին էլ անհավանականների շարքից չէ:

Եթե Գագիկ Ծառուկյանի նախագահական հավակնությունները հաստատվում են, բնական է, որ նա կձգտի իր հզորությանը համարժեք ապագա պաշտպանության նախարար գտնել, իսկ սա, ինչպես հայտնի է, լեգենդար Սյամոյի վարդագույն երազանքն է: Այս առումով երկու հավակնոտ անձնավորությունների դաշինքն ավելի քան տրամաբանական է: Իշխանության համը զգացած և չմոռացած Սյամոն ամեն գնով կցանկանա դիմել ռևանշի: Այս առումով իշխանության ձգտող Ծառուկյանը Բաբայանի հավակնությունների համար ավելի քան հարմար դաշնակից է: Բայց դրա համար երկուսին էլ նախ հարկավոր է միասնական պայքար մղել ընդդեմ Սերժ Սարգսյանի իշխանության:

Լուսինե Կեսոյան