Ինչ-որ մեկը կարող է իր ձին բերել և ասել` սա է ձեր պատգամավորը, և վե՛րջ. Արամ Կարապետյան

«Դեկտեմբերի 2-ի արտահերթ ընտրությունները 3 կարևոր հանգամանք ցույց տվեցին: Ցավոք սրտի, իմ սպասելիքներն այդ առումով արդարացան: Այս մասին Lurer.com-ի հետ զրույցում ասաց «Նոր Ժամանակներ» կուսակցության նախագահ Արամ Կարապետյանը:

«1-ին հանգամանքն այն է, որ քաղաքացիներն արդեն նույնիսկ փողով չեն ցանկանում ընտրության գնալ: Եթե պաշտոնական ընտրողների ընդհանուր թիվը, որոնք պիտի մասնակցեին, և արդեն մասնակցածների թիվը համեմատենք, կնկատենք, որ 23-24% են մարդիկ ընտրվում:  Դուրս է գալիս, որ մեր մոտ 25%-ի շեմը մարդիկ նույնիսկ չեն կարողանում անցնել. այդ ընտրությունների գաղափարը չեն ընկալում:

2-րդ հանգամանքն այն է, որ այսօր Հայաստանում ընտրություն գաղափարը որպես այդպիսին իսպառ բացակայում է, որովհետև ընտրությունները գաղափարների, սկզբունքների, քաղաքական մոտեցումների և քաղաքական խոսքի այլընտրանքներ են: Մեր մոտ նմանատիպ գործընթացն իսպառ բացակայում է: Այդ ամենը հիմա հենվում է փողի, ծանոթության, աներձագների, փեսաների, միգուցե հետո հորեղբոր տղաների, մորաքրոջ աղջիկների վրա: Մեզ մոտ դեգրադացիան հիմա այդպիսին է, ընտրություն գաղափարը, որն աշխարհում ընդունված է նույնիսկ ամենահետամնաց աֆրիկյան երկրներում, մեր մոտ գաղափարը իսպառ ոչնչացված է:

3-րդ՝ այս ընտրությունները մեկ անգամ ևս ցույց տվեցին, որ իշխանությունն ունի հրաշալի ձևավորած մեխանիզմ, որով ամեն անգամ յուրաքանչյուր մարդու կարելի է վերարտադրել: Որևէ մեկին չվիրավորելու համար մենք կարող ենք ասել, որ ինչ-որ մեկը կարող է իր ձին բերել և ասել` սա է ձեր պատգամավորը և վե՛րջ: Ուղիղ քաղաքագիտական համեմատություն եմ անում`ժամանակին Կալիգուլան ձին բերեց սենատ և ասաց՝ սա նոր սենատորն է, հետո Կալիգուլային, իհարկե, խփեցին, բայց դա եղավ հետո, հիմա մեզ մոտ մոտավորապես այդ բարոյահոգեբանական, քաղաքական, քաղաքացիական իրավիճակն է տիրում»,- նկատում է Արամ Կարապետյանը:

ՆԺԿ նախագահը նաև կցանկանար, որ թիվ 1 ընտրատարածքում հաղթանակ տաներ պատգամավորության թեկնածու Ստյոպա Սաֆարյանը, քանի որ իր համար անհասկանալի է, թե ՀՀԿ-ական թեկնածու Ռոբերտ Սարգսյանն ինչ է ուզում խորհրդարանից, և թե խորհրդարանն իրենից ինչ է ուզում: