Ինչի մասին են հայ հանրաճանաչների sms-ները

20 տարի առաջ դեկտեմբերի 3-ին ուղարկվել է առաջին SMS հաղորդագրությունը: 1992 թվականին բրիտանական հեռուստահաղորդակցային ընկերության աշխատակից Նիլ Պեպուորտը SMS հաղորդագրությամբ շնորհավորել է իր գործընկերոջը: Այդ պահից սկսած՝ աշխարհում ուղարկվել է մի քանի տրիլիոն տեքստային կարճ հաղորդագրություն: Վերջին շրջանում, սակայն, SMS-ի մրցակիցն են դարձել հաղորդագրության նոր տեսակները:

Այս բարի առիթով Lurer.com-ը փորձեց պարզել, թե մեր երիտասարդ ճանաչվածներից ովքեր են շարունակում հավատարիմ մնալ 20-ամյա SMS-ին, իսկ ովքեր են այն փոխարինել շփման այլ միջոցներով:

Դերասանուհի Անի Երանյանն, օրինակ, ինչպես խոստովանեց, չափից շատ է օգտվում իր բջջայինի այս ծառայությունից. «Չափից շատ եմ գրում հաղորդագրություններ, որոնք հիմնականում ուղղված են ընկերներիս, իսկ ընտանիքիս անդամներից հայրիկիս հետ եմ պարբերաբար շփվում sms-ների միջոցով»:

Անին բավականին հաճախ հեռախոսահամար փոխելու պատճառով անծանոթ համարներից չի հասցրել հիշարժան հաղորդագրություններ ստանալ, այդուհանդերձ, անանուն sms-ները, ինչպես նշեց դերասանուհին, հիմնականում երկրպագուներից են, որոնց բովանդակությունները գրեթե նույնն են և դրանք գուշակելն այնքան էլ դժվար չէ:

Իսկ հետաքրքիր կամ ծիծաղելի հաղորդագրությունների հեղինակը հենց դերասանուհին է լինում: «Սիրում եմ զավեշտալի բովանդակությամբ տեքստեր ուղարկել ընկերներիս»,- ծիծաղելով խոստովանում է Անին:

Վերջին հաղորդագրությունը դերասանուհուն եղել է Beeline օպերատորից, որը տեղեկացնում էր Անիի զանգած հեռախոսահամարի՝ արդեն հասանելի լինելու մասին:  

Իսկ երգչուհի Սիլվա Հակոբյանն իր վերջին sms-ը ստացել էր Ֆրանսիայում բնակվող իր ուսուցչից, ում հետ, ինչպես պարզվեց, Սիլվան skaype-ի միջոցով վոկալ է պարապում: Ուսուցիչս է գրել. «Սիլվա՛ ջան, վաղը՝ ժամը 3-ին, կարող ենք պարապել: Պաչիկ»:

Սիլվան նաև պատմեց, որ հիմնականում իր բջջայինում գրանցված անունները շփոթելու հետևանքով շատ անհարմար դրությունների մեջ է հայտնվել:

«Շատ ամոթալի դեպք է պատահել, վատ դրության մեջ եմ հայտնվել ու միևնույն է, նորից շարունակում եմ հայտնվել նման իրադրությունում: Իսկ sms ծառայությունից օգտվում եմ միայն այն դեպքերում, երբ շտապ է ասելիքս, իսկ խոսակցիս հարմար չէ հեռախոսով խոսել»:
Երգչուհին հիմնականում հաղորդագրություններով շփվում է քրոջ՝ Մանեի հետ: «Պետք է նաև խոստովանեմ, որ երբեմն sms-ի ծառայությանն եմ դիմում, երբ ասելիքս դժվարանում եմ խոսքերի միջոցով արտահայտել: Այդ կերպ ավելի հեշտ է ստացվում ճիշտ ձևակերպել ասելիքս»,- պատմեց նա:

Զրույցի վերջում երգչուհին չմոռացավ ընթերցողներին մաղթել հետաքրքիր, ինչու չէ, նաև սիրային խոստովանություններով լի sms-հաղորդագրություններ:

Կոլյա Եղիազարյանին, ով հայտնի է որպես «Դժվար ապրուստ» սերիալի Ֆելիքս, հաճախ հաղորդագրություններ գրում է ոչ այլ ոք, քան շատերիս քաջ ծանոթ «Ֆիլհարմոնիկ»-ը: Թեև դերասանի վերջին հաղորդագրությունը, որն ստացել էր գիշերը, այս անգամ նշանածից էր:

«Առանձնապես չեմ գրում sms-ներ, բայց տարատեսակ բովանդակությամբ հաղորդագրություններ հասցնում եմ ստանալ անծանոթ մարդկանցից. մտաբերեցի, երբ նկարահանում էինք սերիալի տեսարաններից մեկը, և ես Միհրան Ծառուկյանի՝ Գոռի դերակատարի հետ,  ըստ սյուժեի, պետք է վթարի ենթարկվեի և ինչի հետևանքով իմ հագուստները պետք է պատառոտվեին: Ու որպեսզի հագիս տաբատը չպատռենք, այն փոխեցի: Արդյունքում դուրս եկավ, որ մի տաբատով նստում եմ ավտոմեքենա, իսկ վթարից հետո այլ տաբատ է հագիս: Սերիալի հեռարձակումից հետո ստացա անծանոթ հեռախոսահամարից  հաղորդագրություն հետևյալ բավանդակությամբ. «Որ ղեկին նստելիս շալվարդ չփոխեիր, վթարի չէիք ենթարկվի»:

Ի տարբերություն մեր նախորդ հերոսների՝ «Գեներալի աղջիկը» սերիալի դերակատար Լուսինեն՝ նույն ինքը՝ Աննա Հարությունյանը, առանձնապես հաղորդագրություններ ո՛չ գրում է, ո՛չ էլ ստանում:

«Հիմնականում ըներուհիս է որևէ զավեշտալի sms գրում, երբ դերս խաղալուց հետո դուրս եմ գալիս բեմից»:

Դերասանուհին իրեն ուղղված հաղորդագրությունների պակասությունը մեկնաբանեց իր հեռախոսահամարը հաճախակի փոխելով:
Այդուհանդերձ, Աննան ինքը ծիծաղեց իր վերջին ստացած հաղորդագրության վրա, որն ուներ հետևյալ բովանդակությունը. «Հարգելի՛ բաժանորդ, Ձեր պարտքը կազմում է 5200 AMD դրամ»:

Ռ. Հակոբյան