«Հաշմանդամներն ունեն հավասար իրավունքներ». ԱՍՀ նախարար

ՀՀ աշխատանքի և սոցիալական հարցերի նախարարն ուղերձ է հղել Հաշմանդամների միջազգային օրվա առթիվ: Ուղերձում ասված է.

«Հարգելի բարեկամներ,

Այսօր՝ դեկտեմբերի 3-ը, հաշմանդամների միջազգային օրն է, որն աշխարհում նշվում է 1992 թվականից՝ ՄԱԿ-ի Գլխավոր ասամբլեայի որոշմամբ:

Թույլ տվեք նախարարության և անձամբ իմ անունից Ձեզ բոլորիդ, հանրապետության բոլոր հաշմանդամություն ունեցող անձանց մաղթել առողջություն և բարեկեցություն:

Ձեր հիմնախնդիրները Հայաստանի Հանրապետության կառավարության, ՀՀ աշխատանքի և սոցիալական հարցերի նախարարության ուշադրության կենտրոնում են: Հոգատարության և աջակցության կարիք ունեն բոլոր հաշմանդամները, այդ թվում՝ մեր ազգի այն քաջարի զավակները, որոնք հաշմանդամ դարձան Հայրենիքը պաշտպանելիս և որոնց առջև պետությունը, մենք բոլորս, կրկնակի բարոյական պատասխանատվություն ենք կրում:

Այսօր մեր պետությունն անում է հնարավորը՝ լուծելու հասարակության խոցելի խմբերի, այս դեպքում՝ հաշմանդամ մարդկանց խնդիրները, որոնք բազմազան են՝ սկսած շրջակա միջավայրի մատչելիության և հավասար պայմանների ապահովումից, մինչև բժշկասոցիալական վերականգնման միջոցառումների իրականացում, զբաղվածության խնդիրների լուծում: Առավել կարևոր է հասարակության կողմից հաշմանդամ մարդկանց նկատմամբ ճիշտ վերաբերմունքի ձևավորումը, այն իրողության գիտակցումը, որ համապատասխան պայմանների առկայության դեպքում հաշմանդամություն ունեցող անձը կարող է լիարժեքորեն ինտեգրվել հասարակություն, աշխատել, արարել: Սա է մեր գերխնդիրը և այս ուղղությամբ պետք է աշխատեն ինչպես պետական կառույցները, այնպես էլ հաշմանդամների հարցերով զբաղվող հասարակական կազմակերպությունները:

«Հաշմանդամներն ունեն հավասար իրավունքներ»,-սա սոսկ խոսք չէ: Հիմնվելով մեր ազգային արժեքների վրա, օգտագործելով զարգացած երկրների փորձը՝ մենք պետք է ստեղծենք այնպիսի հասարակություն, որտեղ հաշմանդամը կապրի լիարժեք կյանքով:

Ավարտելով խոսքս՝ մեկ անգամ ևս Ձեզ և Ձեր մերձավորներին մաղթում եմ առողջություն, վստահություն ապագայի հանդեպ, որը կերտվում է այսօր, մեր համատեղ ջանքերով»: