Ո՞ւմ կպաշտպանի Կարապետյանների կլանը

Նախագահական ընտրությունները փորձաքար կարող են դառնալ հայաստանյան քաղաքական դաշտի շատ խաղացողների, այդ թվում՝ և Կարապետյանների ընտանիքի համար: Մեր տեղեկություններով՝ Սամվել Կարապետյանը (Կալուգայի Սամո) Մոսկվայում այս ընթացքում հանդիպումներ է ունեցել իր հետ քավոր-սանիկային ջերմ հարաբերությունների մեջ գտնվող Գագիկ Ծառուկյանի հետ և հավաստիացրել, որ առաջադրման դեպքում բոլոր միջոցներով կաջակցի նրան: Մյուս եղբայրը՝ Կարեն Կարապետյանը, պարբերաբար կերուխումներ է կազմակերպում պատգամավորների հետ և ստիպում բոլորին խմել նախ իր կենացը և ապա միայն՝ նախագահի: Իսկ Կարապետյանների ընտանիքը բավական ազդեցիկ է, և չի կարելի բացառել, որ որոշակի հաշվարկներից ելնելով՝ ի զորու լինի կշեռքի նժարը տատանել հօգուտ այն կողմի, ում որոշի նախապատվություն տալ, հատկապես, որ եղբայրներից Կարեն Կարապետյանն այսօր իր «քաշային կատերգորիայի» համեմատ բավական ցածր կարգավիճակում է՝ ընդամենը շարքային պատգամավոր է այն դեպքում, երբ տևական ժամանակ վերջինիս հավակնությունները պտտվում էին վարչապետի պաշտոնի շուրջը: Եվ ուրեմն, ինչպե՞ս իրեն կդրսևորի Կարապետյանների կլանը, ի՞նչ կարելի է սպասել Կարապետյան եղբայրներից:

Կարապետյան եղբայրներից Կարենը ՀՀԿ կարկառուն դեմքերից մեկն է՝ ՀՀԿ գործադիր մարմնի անդամ, նախկինում՝ ՀՀԿ խմբակցության ղեկավար, իսկ դրանից հետո որոշ ժամանակ նա պաշտոնավարեց նաև որպես ՀՀ նախագահ Սերժ Սարգսյանի աշխատակազմի ղեկավար: Այսինքն՝ հանձինս Կարեն Կարապետյանի՝ Սերժ Սարգսյանը նախագահական ընտրություններում պետք է որ ամուր թիկունք ունենար: Սակայն...

Կարեն Կարապետյանն անսպասելիորեն հրաժեշտ տվեց նախագահի աշխատակազմի ղեկավարի պաշտոնին: Մինչ այդ էլ նրա պաշտոնավարումն անընդհատ հարցականի տակ էր դրվում, խոսվում էր այն մասին, որ Կարապետյանին խիստ նյարդայնացնում է այն հանգամանքը, որ նախագահականում աշխատակազմի իրական ղեկավարն իր առաջին տեղակալն էր՝ Միքայել Մինասյանը, ով չէր դադարում իր ղեկավարի հոգու հետ խաղալ՝ հյուսելով տարաբնույթ ինտրիգներ:

Կարապետյանի դիրքերը թուլացան հատկապես «Պլաչիդո Դոմինգո կամ ինչպես գահընկեց անել Բեգլարյանին» օպերացիայի ժամանակ, երբ նախագահի աշխատակազմն արդեն սկսեց ցուցադրաբար երես թեքել Կարապետյանից աշխատակազմի անդամին՝ Արամ Կանդայանին (Կնդո) Բեգլարյան Գագիկին «հանձնելու» համար: Սկանդալի նույն օրը աշխատակազմի ղեկավարը հրաժարական էր գրել, և միայն ԱԺ նախագահ Հովիկ Աբրահամյանի միջորդությամբ էր հնարավոր եղել նրան համոզել հետ վերցնել դիմումը՝ առանց այն էլ մեծ աղմուկն է՛լ ավելի չթեժացնելու համար: Հրաժարականը, սակայն, չեղյալ չհամարվեց, այլ միայն հետաձգվեց: Այնպես որ, եկավ օրը, և հնարավորինս անաղմուկ կազմակերպվեց Կարապետյանի հրաժարականը:

Կարեն Կարապետյանը միառժամանակ հեռացավ քաղաքականությունից, հայտարարեց, թե այլևս չի էլ վերադառնալու, պատրաստվում է մնացած կյանքը նվիրել բիզնեսին, սակայն... խորհրդարանական ընտրություններով բիզնեսին նվիրվողն էլի վերադարձավ օրենսդիր աշխատանքի, իհարկե, որոշ վերապահումներով: Ի տարբերություն չորրորդ գումարման ԱԺ-ի, ՀՀԿ խմբակցության ղեկավար Կարեն Կարապետյանի՝ այսօրվա՝ պաշտոնապես շարքային պատգամավոր Կարապետյանը համալրել է ԱԺ-ի, այսպես ասած, «բլադնոյ», «գոլդ» պատգամավորների շարքը՝ ըստ երևույթին, ձգտելով հնարավորինս համապատասխանել մեծամասնական պատգամավորի հայաստանյան իմիջին: Այդպես, Կարապետյանը խորհրդարան է գալիս միայն հատուկենտ օրերի, նիստին մասնակցում ընդամենը մի քանի րոպե` ճիշտ այնքան, որքան, ըստ երևույթին, սահմանված է «գոլդ» պատգամավորների «գրաֆիկով», որից հետո դուրս գալիս և խուսափելով լրագրողների հետ որևէ շփումից` անհետանում` զարգացնելով քայլքի հնարավոր առավելագույն արագություն: Նույն ընթացակարգը պահպանվեց նաև երեկ, երբ փորձեցինք պարզել Կարապետյան ընտանիքի դիրքորոշումը գալիք նախագահական ընտրությունների վերաբերյալ:

Կարեն Կարապետյանը հարցը լսեց, լսեց՝ հընթացս գրեթե վազեցնելով ու այդպես էլ չկանգնելով (Կարապետյանի՝ լրագրողի աշխատանքին ոչ այդքան նպաստավոր արագ քայլքը քիչ էր, կողքից, պարզվեց, գործում էին նաև պատգամավորների «օժանդակ ջոկատները». Սամվել Ալեքսանյանը փորձեց նախ թևիցս բռնելով հետ պահել հարց տալուց. «Հոպարիս մի՛ նեղի, հոպարիս հետ գործ չունես, վա՜յ, մի րոպե, հոպա՛ր ջան», հետո էլ Գրիգոր Մարգարյանը փորձ արեց Կարապետյանին «փրկել». մի խոսքով, բոլորը փորձում էին «փրկել» Կարապետյանին, թե ինչից, այդպես էլ մնաց անհասկանալի, հատկապես, որ ավելի քան տրամաբանական էր, որ երբեմնի՝ նման պաշտոններ զբաղեցրած անձնավորության համար ընդամենը մի սովորական հարցի պատասխանելն այդքան էլ մեծ բարդություն չէր կարող ներկայացնել): Դրսում արդեն Կարապետյանը մի պահ կանգնեց և հնչեցրեց իր պատասխանը.

- Ես այսօր չեմ պատասխանի:

- Բայց ի՞նչ տարբերություն, պարո՛ն Կարապետյան, այսօր, թե մեկ ուրիշ օր:

- Ես չասեցի, թե կպատասխանեմ, կարող եմ չէ՞ չպատասխանել:

- Իսկ ե՞րբ կպատասխանեք, վաղը կպատասխանե՞ք:

- Հետո:

- Հետո ե՞րբ:

-Առաջադրումները թող լինեն, նոր կխոսեմ,- բազմանշանակ ժպտալով ասաց պատգամավորը:

Եվ այսպես, ամեն ինչ կախված է առաջադրումներից: Սամվել Կարապետյանը, ով, ինչպես հայտնի է, ռուսաստանյան պետական շրջանակներում լուրջ ազդեցություն ունի (որտեղ էլ, ըստ էության, որոշվում է ՀՀ նախագահի կանդիդատուրան), որոշակի խոստումներ է տալիս Ծառուկյանին: Դրան զուգահեռ եղբայրը՝ Հայաստանում Կարապետյանների ընտանիքի ներկայացուցիչը, որ, ըստ ամենայնի, հոգու խորքում ինչ-ինչ դժգոհություններ ունի ամբարած, փորձում է մինչև վերջ պահպանել ինտրիգը՝ միաժամանակ բազմանշանակ ժպիտով կարծես թե խոստանալով գաղտնազերծել ամեն ինչ առաջադրումներից հետո. Սերժ Սարգսյանի առաջադրման հետ կապված ամեն ինչ պարզ է՝ դեկտեմբերի 15-ին ՀՀԿ համագումարն է, որտեղ էլ պաշտոնապես կհաստատվի նախագահի առաջադրումը: Ըստ այդմ, որոշիչն, ըստ էության, Գագիկ Ծառուկյանի առաջադրումն է՝ ԲՀԿ ղեկավարի «կայացրած որոշման» գաղտնազերծումը, որից հետո էլ երևի թե կգաղտնազերծվի նաև Կարապետյանների կլանի իրական խաղը:

ՀԵՏԳՐՈՒԹՅՈՒՆ

Այսօր արդեն Կարեն Կարապետյանը զարմանալիորեն շռայլ գտնվեց և, կարելի է ասել, հենց սեփական նախաձեռնությամբ պատասխան տվեց երեկվա հարցին. «Մենք երկդիմի խաղեր չենք խաղում: Մեր ընտանիքում չի կարող լինել երկու տեսակետ, ինչ ասվում է, դա էլ արվում է, իհարկե, նախապես քննարկելուց ու որոշելուց հետո»:

Ահա այսպիսի բազմանշանակ, խորիմաստ պատասխան... Մարտավարության գաղտնազերծումն, ըստ էության, էլի հետաձգվում է մինչև առաջադրումներ, որից հետո այլևս երկդիմի խաղ հնարավոր էլ չի լինի խաղալ՝ կա՛մ այս կողմ, կա՛մ այն...

Լուսինե Կեսոյան