Հայաստանը կարող է օրինակ ծառայել շատ երկրների համար

Դեկտեմբերի 4-ին ՀՀ ԱԻ նախարարության նիստերի դահլիճում տեղի ունեցավ Անտառային հրդեհների կառավարման ազգային երկրորդ կլոր սեղանը։

Միջոցառումը կազմակերպել են ԵԱՀԿ երևանյան գրասենյակը և Հայաստանի արտակարգ իրավիճակների նախարարությունը՝ Համաշխարհային հրդեհների վերահսկման կենտրոնի (ՀՀՎԿ) համագործակցությամբ՝ «Շրջակա միջավայրը և անվտանգությունը» (ՇՄԱ) նախաձեռնության շրջանակներում։

Կլոր սեղանին մասնակցեցին ԵԱՀԿ երևանյան գրասենյակի, ՀՀ արտակարգ իրավիճակների նախարարության, Հրդեհների մոնիտորինգի գլոբալ կենտրոնի, ՀՀ արտաքին գործերի նախարարության, ՀՀ բնապահպանության նախարարության, ՀՀ գյուղատնտեսության նախարարության, ՀՀ տարածքային կառավարման նախարարության, ՀՀ պաշտպանության նախարարության, ՀՀ Ոստիկանության, ՀՀ ազգային անվտանգության ծառայության, ՀՀ առողջապահության նախարարության, ՀՀ անշարժ գույքի կադաստրի պետական կոմիտեի, Միավորված ազգերի Զարգացման ծրագրի հայաստանյան գրասենյակի, Հայաստանի ազգային ագրարային համալսարանի, Գորիսի Օրհուսի կենտրոնի, Հայաստանի ծառատունկ ծրագրի և Հայաստանի անտառներ ՀԿ-ի ներկայացուցիչները։

Բացման խոսքում ՀՀ ԱԻՆ ՓԾ տնօրենի տեղակալ, գեներալ-մայոր Վրեժ Գաբիելյանը մասնավորապես ասաց. «Աշխարհում ամեն օր 200 հազարից ավելի անտառային հրդեհ է գրանցվում, որոնց հետևանքով զոհվում են մարդիկ, ոչնչանում է ֆլորան ու ֆաունան,վնասվում են հողաշերտն ու մոտակա բնակավայրերը, աղտուտվում է մթնոլորտը, շարքից դուրս են գալիս կապի և էլեկտրահաղորդման գծերը, փայտաշեն կամուրջները, գյուղատնտեսական ցանքատարածությունները և, ի վերջո, խաթարվում են երկրի տնտեսական կառավարման ենթահամակարգերը: Հայաստանի չոր կլիմայական պայմաններում անտառային հրդեհների դեմ համակողմանի և հետևողական պայքար չկազմակերպելու դեպքում, այն կարող է հանգեցնել էկոլոգիական աղետի: Հենց դա է պատճառը, որ քննարկվող հարցն իր հրատապությամբ մեր երկրի համար ունի ռազմավարական նշանակություն»:

Շարունակելով թեման՝ ԵԱՀԿ երևանյան գրասենյակի ղեկավարի տեղակալ Վիլյամ Հենլոնը նշեց. «Անտառային հրդեհների դեմ պայքարը կարևորագույն խնդիր է: Սա ՇՄԱ-ի նախաձեռնությունն է, որին ներգրավված են մի շարք միջազգային կազմակերպություններ: Պետք է մշակել Հարավկովկասյան երկրներում անտառնային հրդեհների դեմ պայքարի արդյունավետ ռազմավարություն»:

Անդրադառնալով Վ. Հենլոնի խոսքին՝ Յոհան Գոլդամմերը՝ Հրդեհների մոնիտորինգի գլոբալ կենտրոնից, մասնավորապես ասաց. «Մեր համագործակցությունն ունի վեց տարվա պատմություն, և արդեն կա նկատելի առաջընթաց: Մեր կենտրոնը գտնվում է Գերմանիայում և համագործակցում է ինչպես Հայաստանի, այնպես էլ ԵԱՀԿ-ի հետ: Կան բազմաթիվ դասեր, որոնք կարող ենք քաղել միմյանցից: Հայաստանը միշտ ակտիվ գործընկեր է եղել և իր զգալի ավանդն ունի, ամբողջ աշխարհում, հրդեհների ակտիվությունը նվազեցնելու գործում: Անտառային հրդեհների դեմ պայքարը հնարավոր չէ լուծել մեկ կազմակերպության շրջանակներում: ՀՀ ԱԻՆ-ը կարևորագույն քայլ է կատարել այս ուղղությամբ՝ ստեղծելով միջգերատեսչական աշխատանքային խումբ: Հայաստանը, այս ոլորտում, արդեն կարող է լավ օրինակ ծառայել շատ երկրների համար»:

Նիստի ընթացքում ԵԱՀԿ երևանյան գրասենյակի ՇՄԱ Ազգային ծրագրի պատասխանատու Էդվարդ Սաֆարյանը ներկայացրեց Հայաստանում անտառների և հողերի կառավարման ոլորտում անտառային հրդեհների աղետի կրճատման, անտառային հրդեհների կանխարգելման և վերահսկման, ինչպես նաև կրակի օգտագործման ոլորտում գործող օրենսդրական, կարգավորող և ինստիտուցիոնալ դաշտի վերաբերյալ իր զեկույցը, որն ամփոփելիս նշեց. «Անտառային հրդեհները և այլ վայրի հրդեհները ընկալվում են որպես բարդ երևույթներ, որոնց ժամանակ,ի լրումն երեք նախարարությունների՝ ՀՀ գյուղատնտեսության, ՀՀ բնապահպանության և ՀՀ արտակարգ իրավիճակների, հարկավոր է ավելի մեծ թվով կազմակերպական միավորների փոխազդեցություն: Անհրաժեշտություն կա նաև նախաձեռնել անտառային հրդեհների կառավարման ազգային քաղաքականության և դրա իրականացման ռազմավարության մշակման գործընթացը»:

Հանդիպման վերջում քննարկվեցին հրդեհների կառավարման ազգային ծրագրի և իրագործման ռազմավարության մեջ ներգրավվող շրջանակների և հիմնական խնդիրների վերաբերյալ հարցեր: Մասնավորապես' ազգային քաղաքականության և իրագործման ռազմավարության ինստիտուցիոնալ ասպեկտները, հրդեհների կառավարման ազգային ծրագրի և իրագործման ռազմավարության մեջ ներգրավվող շրջանակների և հիմնական խնդիրների ճշգրտումը, ՀՀ անտառային և այլ բուսածածկ տարածքների հրդեհների կառավարման բարելավման համալիր միջոցառումների ծրագիրը և դրա աշխատանքային խումբը:

Ամփոփելով քննարկումը' կողմերի միջև համաձայնություն ձեռք բերվեց շարունակել համագործակցությունը: