Ա՜խ, այդ Աշոտյանը

Հայաստանի ամենամեծ «չուզողը» Աշոտյանն է: Ուրիշ տարբերակ չկա: Ծառուկյան Գագիկն ուզում է, Աշոտյանը բռնում ու «չուզողություն» է անում, էլի՛: Ծառուկյան Գագիկը դեռ մեկ տարի առաջ էր ուզում. մարդն ուզում էր ուսանողներին օգներ. ի՞նչ վատ բան էր ուզում, որ, ասում էր՝ «էս՝ ես, էս՝ իմ բարեգործական հիմնադրամը, ռեկտորներ ջան, եկեք, ինձ ցուցակներ ուղարկեք (չշփոթել Ստեփան Դեմիրճյանի ցուցակների հետ՝ սրանք կարգին ցուցակներ էին), ասեք՝ ինչ լավ ուսանողներ ունեք, ո՞ւմ օգնեմ, չեմ էլ նայի՝ որ կուսակցությունից են, մենակ դուք էդ ցուցակները ուղարկեք, ես փողը տամ»: Ռեկտորներն արդեն ոգևորվել էին, մտածում էին, դե, մարդ ա, էլի բան ա, մի 10 հազար դրամը քիչ փող չի, արդեն կարգադրել էին ցուցակներ կազմել, էս, էն, մեկ էլ՝ ամենամեծ «չուզող» Աշոտյանը բռնեց ու «քըրթ» կտրեց առանց էն էլ «քյասիբ» ուսանողների «հացը»՝ «մեզի ջինըս պետքը չէ»՝ ԲՀԿ-ից օգնություն չվերցնել. կարգադրեց նախարարը, ռեկտորներն էլ գլուխները կախ կատարեցին: Ինչո՞ւ, որովհետև դեռ մեկ տարի առաջ արդեն ՀՀԿ-ն ու ԲՀԿ-ն սկսել էին իրար «պոզեր ցույց տալ»: Մեջտեղը ովքե՞ր տուժեցին. դե, իհարկե, մեր խեղճ ու կրակ ուսանողները, որ էդ փողով գոնե մի օր կուշտ հաց կուտեին:

Անցավ մեկ տարի ու պարզվեց, որ ԲՀԿ-ն էս բանը չէր մոռացել: Ծառուկյանի երիտասարդ Վահե Էնֆիաջյանը բռնեց ու ԱԺ հայտարարությունների ժամին «ալամ աշխարհով» խայտառակ արեց Արմեն Աշոտյանին ու ինչ կար հիշեցրեց. «ուսանողները շարունակում են ընդամենը 5000 դրամ կրթաթոշակ ստանալ, երբ վարձավճարները հարյուր հազարների են հասնում: Գագիկ Ծառուկյանն ուզում էր ուսանողներին օգնել... ոլորտում տիրում է բարձիթողի վիճակ, Աշոտյանն արգելեց...»:

ՀՀԿ-ի ու ԲՀԿ-ի ջրերը, ինչպես գիտենք, արդեն ընդհանրապես մի առվով չեն հոսում: Բայց, ինչպես տեսնում ենք, ծառուկյանական օգնությունը դեռ ուժի մեջ է: Դե, հո ընտրակաշա՞ռք չի տալիս, հետո ի՞նչ, թե նախընտրական շրջան է, մարդն ուզում է «մաքուրով» ուսանողներին ուղղակի օգնած լինել, խոստանում են՝ CNN-ով էլ ցույց չեն տա, ընդամենը «Կենտրոն»-ով, ընդամենը մի 10 անգամ ռեպորտաժ կանեն ու վերջ, էն էլ... էդ «չուզող» Աշոտյանն էլի երևի իրենը կանի ու էլի ուսանողների «հացը կկտրի»: Ա՛յ, սենց ա լինում, էլի, որ մեր մեկն «ըտենց էլ» երկուս չի դառնում:

Լուսինե Կեսոյան