«Հրապարակ». Ո՞վ կլինի «Թերլեմեզյանի» հաջորդ տնօրենը

Չնայած դեռ 2 օր կա հայտերի  ընդունման վերջնաժամկետին, բայց Թերլեմեզյանի անվան պետական քոլեջի տնօրենի հիմնական հավակնորդների անունները պարզ են, իսկ նրանք այս պահի դրությամբ երեքն են՝ առաջինը Աննա Մնացականյանն է՝ ներկայիս ժամանակավոր պաշտոնակատարը, ով մասնագիտությամբ ծրագրավորող է և ճանաչելի է ավելի շատ որպես Ալվարդ Պետրոսյանի հարս և նախկին տնօրեն Նարեկ Առուշանյանի այրի: Երկրորդը՝ «Թերլեմեզյանի» դասախոս Դավիթ Դավթյանն է, ում թեկնածությունն առաջադրելու հարցն ի սկզբանե բարձրացրել էին հենց «Թերլեմեզյանի» դասախոսներն ու ուսանողները: 3-րդ հավակնորդը և այս իրարանցման մեջ շատերին անհայտ թեկնածուն Արմեն Հարությունյանն է, ով «Հայբուսակ» համալսարանի մանկավարժության ամբիոնի դոցենտ է: Կրթության և գիտության նախարարության անձնակազմի կառավարման վարչության պետ Ռուզաննա Գրիգորյանի խոսքերով, կարևոր չէ՝ տվյալ անձնավորությունը դասավանդո՞ւմ է այդ հաստատությունում, թե՞ ոչ. եթե համապատասխանում է չափանիշներին, ուրեմն կարող է դիմել տնօրենի մրցույթին. «Մրցույթն ունի և՛ թեստավորման փուլ, և՛ հարցազրույցի փուլ, և պետք է զարգացման ծրագիր ներկայացնի»: Ինչպես «Հրապարակի» հետ զրույցում նշեց Գրիգորյանը, տնօրենի պաշտոնի մրցույթի համար մի քանի հոգի էլ են զանգահարել, ինչը նշանակում է, որ այսքանով գուցե չսահմանափակվի տնօրենի աթոռին հավակնող դիմողների թիվը:

Իսկ իր հաջորդ տնօրենին «Թերլեմեզյանը» կընտրի դեկետմբերի 14-ին, մրցույթն անցկացնելու է քոլեջի խորհուրդը, որի նախագահն է դաշնակցական Աշոտ Փափազյանը: Նախաձեռնող խմբից հետաքրքվելով վերջինիս անձի մասին՝ «Հրապարակը» պարզեց, որ Փափազյանը (մականունը՝ Պադոշ  Աշոտ) ընդամենը Նարեկ Առուշանյանի մտերիմ ընկերն է եղել, 2008-ին Առուշանյանը հենց նրան էլ նշանակել է «Թերլեմեզյանի» խորհրդի նախագահ: Նա նաև Կոմիտասի շուկայի տնօրենն է: Ըստ խոսակցությունների, Կոմիտասի շուկայից, ոչ իր անունով , մասնաբաժին ունի նաև Ալվարդ Պետրոսյանը: Ավելին՝ իրենց ընտանիքի բարեկամին այդ պաշտոնում պահելու համար մոտ երկու շաբաթ առաջ խորհրդի նախագահի ընտրություններ են անցկացվել և պաշտոնում վերընտրել են Աշոտ Փափազյանին: Ակնհայտ է, որ այդ քայլով թե՛ Ալվարդ Պետրոսյանը, և թե՛ նրա հարս  Աննա Մնացականյանը տնօրենի մրցույթին ընդառաջ ամրցրել են իրենց թիկունքը: