Այս օրը մահացել է Կլոդ Մոնեն (լուսանկարներ)

1926-ի դեկտեմբերի 5-ին 87 տարեկան հասակում մահացել է ֆրանսիացի նկարիչ Կլոդ Մոնեն: Վերջինս իմպրեսիոնիզմի հիմնադիրներից է, ով  մշակել է գեղանկարչության այդ ուղղության սկզբունքները և տեխնիկան:

Կլոդ Մոնեն 1858–59թթ. Հավրում աշակերտել է ֆրանսիացի նկարիչ Էժեն Բուդենին, 1859–60-ին սովորել Փարիզի «Սյուիս» ակադեմիայում:
Իմպրեսիոնիզմի յուրահատկությունները լիարժեքորեն արտահայտվել են նրա արվեստում, որի ցայտուն օրինակներից է «Տպավորություն. Արևածագ» (1872թ.) բնանկարը: Նկարչի վաղ շրջանի ստեղծագործությունները հիմնականում բնանկարներ ու դիմանկարներ են՝ «Նախաճաշ բնության գրկում» (1866 թ.), «Կամիլլա» (1866 թ.), «Կինն այգում» (1866–67 թթ.), որտեղ շեշտված են լույսի և օդի փոփոխությունը, բնության գունային հարստությունը:

1860-ական թվականների վերջից Մոնեն ստեղծագործել է հիմնականում բնանկարի ժանրում, որտեղ մարդը բնապատկերի ներդաշնակ և անբաժան տարրերից է: Բնանկարի մոտիվը Մոնեն վերածել է հավերժ կենդանի բնության մի մասնիկի՝ ներքին թրթիռով ու շարժումով լի: Նրա կտավների սյուժեները պարզ են և գրավիչ. «մշտապես շարժվող» մարդկանցով լեցուն պուրակներ ու հրապարակներ («Կապուցիների բուլվարը», 1873թ., «Բել-Իլի ժայռերը», 1886թ., և այլն):

Բնանկարների շարքում նկարիչն արտահայտել է բնության և մթնոլորտի փոխակերպումներն օրվա տարբեր պահերի ու եղանակների («Կակաչների դաշտը», 1880թ., «Լողացող սառույց», 1880թ., «Խոտի դեզը», 1890–91թթ., «Ռուանի տաճարը», 1893–95թթ., «Վենետիկի մեծ ջրանցքը», 1908թ.):

{gallery}057{/gallery}