ՀՀ բնակչության 34.4%-ը կենտրոնացված է մայրաքաղաքում

ՀՀ մշտական բնակչության քաղաքային և գյուղական բաշխվածությունը պահպանվել է զգալիորեն կայուն: Այսպես, 2012թ.-ի, ինչպես և 2009-2011թթ. տարեսկզբերին քաղաքային բնակչության մասնաբաժինը կազմել է` 64%, իսկ գյուղական բնակչությանը` 36%: 2005-2008թթ.-ին արձանագրված միջին ցուցանիշները կազմել են, համապատասխանաբար` 64.1% և 35.9%, ընդգծելով բնակչության քաղաքային և գյուղական բաշխվածության կայունության բարձր աստիճան:

Այս տարվա տարեսկզբին ՀՀ մշտական բնակչության կազմում` 48.6%-ը կազմել են տղամարդիկ և 51.4%-ը` կանայք: Բնակչության միջին տարիքը, 2012թ.-ի տարեսկզբի դրությամբ, կազմել է 35.3 տարի, արական սեռի համար` 33.5, իսկ իգականի համար` 36.9 տարի:

ՀՀ մշտական բնակչության կառուցվածքում 0-15 տարեկան երեխաների տեսակարար կշիռը, որը 1990թ.-ին 32.2% էր, 2012թ.-ի տարեսկզբի դրությամբ կազմել` 19.4%, աշխատունակ տարիքի բնակչության տեսակարար կշիռը (1990թ.-ին` 59.7%) հաշվետու ժամանակաշրջանի դրությամբ կազմել 69.5%, իսկ աշխատունակ տարիքից բարձր բնակչության տեսակարար կշիռը (1990թ.-ին` 8.1%) 2011թ. տարեսկզբի դրությամբ կազմել է` 11.1%:

2012թ. տարեսկզբի դրությամբ աշխատանքային տարիքի ամեն 1 000 մարդու հաշվով հաշվառվել է 439` 0-15 տարեկան երեխա և կենսաթոշակառու, 2011թ.-ի նույն ժամանակահատվածում արձանագրված 452 մարդու նկատմամբ: Նվազումը հիմնականում տեղի է ունեցել ի հաշիվ 0-15 տարեկան բնակչության տարիքային խմբի, որի մասնաբաժինը նվազել է` 0.4%-ային կետով (քանի որ այս տարիքային խմբից աշխատունակ տարիք անցում է կատարել ավելի մեծաթիվ բնակչություն, քան այդ խումբը համալրվել է նորածիններով), որի հետևանքով 0.6%-ային կետով աճել է աշխատունակ տարիքի բնակչության մասնաբաժինը, իսկ աշխատունակ տարիքից բարձր բնակչության
մասնաբաժինը նվազել է 0.2 տոկոսային կետով:

Ժողովրդագրական իրավիճակի առկա հիմնախնդիրներից է բնակչության ժողովըրդագրական ծերացումը, որի ընթացքը հանրապետությունում հետխորհրդային տարիներին մեծապես արագացել է: Բնակչության ծերացումը կամ ժողովրդագրական ծերացումը երկարատև ժողովրդագրական փոփոխությունների, բնակչության վերարտադրության, ծնելիության, մահացության և դրանց հարաբերակցություններում տեղ գտած տեղաշարժերի, ինչպես նաև, մասամբ, միգրացիայի հետևանք է:

Ըստ ՄԱԿ-ի ժողովրդագրական ծերացման սանդղակի, եթե երկրի բնակչության կառուցվածքում 65 և բարձր տարիքի բնակչությունը կազմում է 7%-ից ավելի, ապա տվյալ բնակչությունը համարվում է ծերացած, այդ ցուցանիշը 2012թ. տարեսկզբի դրությամբ ՀՀ-ում կազմել է 9.7%:

2012թ. տարեսկզբի դրությամբ մշտական բնակչության 34.4%-ը կենտրոնացված է Երևան քաղաքում, իսկ ՀՀ Արարատի, Արմավիրի, Լոռու, Կոտայքի և Շիրակի մարզերից յուրաքանչյուրում բնակվել է հանրապետության մշտական բնակչության 8.6 - 8.8-ական
%-ը, ՀՀ Գեղարքունիքի մարզում`7.4%-ը, ՀՀ Արագածոտնի, Սյունիքի և Տավուշի մարզերից յուրաքանչյուրում` 4.1-4.7-ական %-ը, իսկ 1.7%-ը` ՀՀ Վայոց ձորի մարզում: