ԵԽ «Եվրոպական ժառանգության ցանց»-ի 11-րդ հավաքը՝ Ստրասբուրգում

ՀՀ մշակույթի նախարարության աշխատակազմի արտաքին կապերի վարչության պետի տեղակալի պաշտոնակատար Արտաշես Առաքելյանը 2012 թ. նոյեմբերի 28-30-ը մասնակցել է Ստրասբուրգում կայացած Եվրոպական ժառանգության ցանցի (HEREIN) տերմինաբանական բառարանի թղթակիցների ամենամյա 3-րդ և ազգային համակարգողների տարեկան 11-րդ հավաքին: Եվրոպական ժառանգության ցանցը մշտական տեղեկատվական համակարգ է, որը պետական և հասարակական տարբեր կազմակերպությունների, մասնագետների, հետազոտողների համար դարձել է տեղեկատվության հիմնարար աղբյուր՝ Եվրոպայի խորհրդի հովանու ներքո միավորելով շուրջ 43 երկրի համապատասխան գերատեսչություններ: HEREIN-ի ազգային համակարգողների 11-րդ տարեկան հավաքի ընթացքում ներկայացվել է ԵԽ-ի մշակութային ժառանգության և լանդշաֆտների հարցերով կոմիտեի գործունեությունը և կառուցվածքը, այն է՝ 9 անդամներից բաղկացած կոմիտեն մոնիթորինգի է ենթարկելու ԵԽ-ի կոնվենցիաների՝ Եվրոպայի ճարտարապետական ժառանգության պահպանության (1985թ.), Հնագիտական ժառանգության պահպանության (վերանայված) (1992 թ.), Լանդշաֆտի (2000 թ.) և Հասարակության համար մշակութային ժառանգության արժևորման շրջանակային (ուժի մեջ է մտել 2012 թ. դեկտեմբերի 1-ից) դրույթների կատարումը: Հայաստանի Հանրապետությունը նույնպես միացել է նշված կոնվենցիաներին: Ներկայացվել է նաև ԵԽ-ում իրականացվող բարեփոխումների ընթացքը և HEREIN-ի ինստիտուցիոնալ և ռազմավարական շրջանակը:

HEREIN-ի գործունեության հիմնավորմանը, կառավարմանը, նպատակներին և հաղորդակցման միջոցներին նվիրված կլոր-սեղան քննարկումների ժամանակ հայկական կողմը հանդես է եկել HEREIN-ը մշակութային ժառանգության ռազմավարական հետազոտությունների կենտրոնի վերակազմակերպելու առաջարկությամբ, ինչն արժանացել է Ֆրանսիայի, Լեհաստանի, Բելգիայի պատվիրակների և HEREIN-ի ազգային համակարգողների կազմակերպիչների հավանությանը: Քննարկումների ավարտին ներկայացվել է HEREIN-ի 2013 թ. գործողությունների ծրագիրը: