«Հրապարակ». ԵԽ խորհրդականների մոտ ԲՀԿ–ն թողել է իշխանություն զավթելու կառույցի տպավորություն

ԲՀԿ-ի և նրա ղեկավարի մասին եվրոպական խորհրդարանականների և քաղաքական գործիչների համատեղ գրավոր կարծիքը շատ հետաքրքիր դրվագներ է բացահայտում, թե ինչ տպավորություն են նրանք ստացել Հայաստանի երկրորդ քաղաքական ուժի հետ իրենց հանդիպումներից:

«Կուսակցությունը թողեց ոչ թե իսկապես արժեքների վրա հիմնված կառույցի, այլ սոսկ իշխանություն զավթելու և այն ավելացնելու գործիքի տպավորություն:

Պատվիրակության մոտ շփոթմունք և մտահոգություններ առաջացրին կուսակցության առաջնորդի՝ ծայրահեղ բարեկեցիկ օլիգարխի, անձնական ունեցվածքի և շահերի նույնականությունն իր իսկ հիմնադրամի և կուսակցության ունեցվածքի և շահերի հետ:

Պոպուլիստական կեցվածք որդեգրելով և քաղաքացիներին մասնավոր ու անըմբռնելի ֆինանսական աջակցություն ցուցաբերելով (որը բարեգործության և ընտրակաշառքի միջև ինչ-որ տեղ է)՝ «Բարգավաճ Հայաստանը» դարձել է ամուր քաղաքական ուժ:

Ավելին, քանի որ այս կուսակցությունում ամեն ինչ թվում է իր առաջնորդից կախված, ներքին քննարկումների կամ ներկուսակցական ժողովրդավարության նշույլներ հնարավոր չեղավ բացահայտել:

Կուսակցության առաջնորդը թվաց մտահոգ և ներգրավված իր գործնական աշխատանքում, սակայն նրա դիրքորոշումները միջազգային հարաբերությունների և ներկա քաղաքական խնդիրների վերաբերյալ բավականին թույլ էին:

«Բարգավաճ Հայաստանը» բավականին արհեստական տպավորություն թողեց»:

Սրանք բառացի մեջբերումներ են եվրոպական խորհրդարանականների առաքելության հաշվետվությունից, որը նրանք կազմել են ԲՀԿ ղեկավարների հետ հանդիպումներից հետո այն ժամանակ, երբ կուսակցությունը հայտ էր ներկայացրել անդամակցելու Եվրոպական ժողովրդավարական կուսակցությանը: Հիմա արդեն պարզ է դառնում, թե ինչու այդ հայտը նման ճակատագրի արժանացավ: Այս մասին գրել է «Հրապարակը», նշելով, որ իրենց  տրամադրության տակ հայտնված հաշվետվության մանրամասներին կանդրադառնան առաջիկայում: