«ՀԺ». Եվ վստահ եմ, որ Լևոն Տեր-Պետրոսյանը կառաջադրվի. Զոյա Թադևոսյան

ԲՀԿ նախագահ Գագիկ Ծառուկյանը և նրա ղեկավարած պատվիրակությունը կվերադառնան Բրյուսելից, և հնարավոր է` նա հրապարակի նախագահական ընտրություններին մասնակցության վերաբերյալ իր դիրքորոշումը: «Հայկական ժամանակ»-ը գրում է, որ համենայնդեպս, մինչ նրա Բրյոաել մեկնելը ԲՀԿ-ամերձ շրջանակներում խոսում էին, որ որոշումը կհրապարակվի վերադարձից անմիջապես հետո: Ի՞նչ կասի Ծառուկյանը: Թեև քաղաքական և հասարակական որոշ շրջանակներ բացառում են, որ նա կհայտարարի իր առաջադրման մասին, և վստահ են, որ «կավետի», թե սատարում է Սերժ Սարգսյանին, այդուհանդերձ, մինչ այժմ տեղի ունեցած մի քանի գործընթացներ խոսում են հօգուտ Ծառուկյանի առաջադրման (առաջադրվելն, իհարկե, չի բացառում սատարելը): Մասնավորապես, երեկ Աժ ԲՀԿ խմբակցությունն իր ողջ կազմով (չհաշված մի քանի բացակայի) «դեմ» քվեարկեց 2013-ի բյուջեի նախագծին: Մինչ այդ նրանք միացան ՀԱԿ-ի հեղինակած Ընտրական օրենսգրքի բարեփոխումների փաթեթի հարցով Աժ արտահերթ նիստ հրավիրելու նախաձեռնությանը: Միացան նաև նույն հարցով ՍԴ դիմելու ՀԱԿ նախաձեռնությանը, նաև հայտարարեցին, որ կողմ են Աժ Մարտի 1-ի ժամանակավոր հանձնաժողով ստեղծելու նախաձեռնությանը:

Մի խոսքով, Ծառուկյանի առաջադրման տարբերակը վկայող փաստերն ավելի շատ են քան չառաջադրման:

«Ես իրավասու եմ կարծիք հայտնել «Ժողովրդի իշխանության» անունից, և մենք միշտ հայտարարել ենք, որ մեր թեկնածուն ՀԱԿ առաջնորդ Լևոն Տեր-Պետրոսյանն է: Եվ եթե գնում էին կոնսուլտացիաներ այն առումով, որ ընդդիմությունը միասնական թեկնածու պետք է առաջադրեր, ենթադրենք, հիպոթետիկ դա տեղի չի ունենում, ուրեմն' յուրաքանչյուր քաղաքական ուժ կառաջադրի իր թեկնածուին, մենք, բնականաբար, կպաշտպանենք այն թեկնածուին, որին ցանկացել ենք պաշտպանել միշտ, այսինքն' Լևոն Տեր- Պետրոսյանին»,- ասաց ՀԱԿ-ին մաս կազմող «Ժողովրդի իշխանություն» նախաձեռնության համակարգող Զոյա Թադևոսյանը: Իսկ եթե Տեր-Պետրոսյանը չառաջադրվի, բայց առաջադրվի Ծառուկյանը, այդ դեպքում ի՞նչ դիրքորոշում կունենաք` «ՀԺ» ճշտող հարցին նա պատասխանեց. «Ես շատ կասկածում եմ, որ երբևէ իրական ընդդիմությանը չեմ պաշտպանելու: Ինձ համար ամենակարևորն իրական ընդդիմություն լինելն է: Եվ վստահ եմ, որ Լևոն Տեր-Պետրոսյանը կառաջադրվի, իսկ եթե չառաջադրվի, որպես քաղաքացի արդեն կմտածեմ` ինչ անել: Հավանաբար` չեմ մասնակցի ընտրություններին»: