ՊՆ-ն 9 զոհված զինծառայողի հուղարկավորության համար պայմանագիր է կնքել

Օրեր առաջ՝ հոկտեմբերի 1-ին, Պաշտպանության նախարարությունը «հրատապ մեկ անձ» ընթացակարգով պայմանագիր է կնքել «Նորայր Օրդուխանյան Մայիսի Ա/Ձ»-ի հետ։

ՊՆ-ն 1մլն 890 հազար ՀՀ դրամով սգո ծառայություն է պատվիրել, որի մեջ մտնում է՝ սգո սրահ, դիատար մեքենա և դագաղ։

Պայմանագրի տեխնիկական բնութագրում նշված է, որ Նորայր «Նորայր Օրդուխանյան Մայիսի Ա/Ձ»-ն պարտավորվում է կատարել․
«Թվով 9 զոհված զինծառայողների հուղարկավորության կազմակերպում ք. Երևանում և ՀՀ այլ համայնքներում՝ ըստ ՀՀ ԶՈՒ ԲՀԱ վարչության հայտերի: Յուրաքանչյուր զինծառայողի հուղարկավորության համար անհարժեշտ է ապահովել փայտե հատակով, փայտե բռնակով, լամինատից պատրաստված, ըստ զոհվածի հասակի դագաղ (բաց վիճակի համար նաև ծածկոցով)։ Ըստ ներկայացված հայտերի անհրաժեշտ է ապահովել մեկ դիատար մեքենա՝ սգո սրահից թաղման վայր երթ կատարելու համար։ Ըստ անհրաժեշտության ապահովել նաև սգո սրահի ծառայություն՝ ք. Երևանում և ՀՀ այլ համայնքներում՝ ըստ ՀՀ ԶՈՒ ԲՀԱ վարչության հայտերի»:

Պայմանագրում ծառայության մատուցման ժամկետ է նշված 2024 թ-ի 4-րդ եռամսյակ, բայց ոչ ուշ, քան 2024 թվականի նոյեմբերի 30-ը։

Դիմեցինք ՊՆ մամուլի խոսնակ Արամ Թորոսյանին, ով մեր հարցին ի պատասխան խնդրեց, որ գրավոր հարցմամբ դիմենք։